جديد حمران النواظر ( انتي وانا مذكرات ام) روعه

حور وهي واقفة بتململ مكانها وشعرها الناعم بالعادة مجعد اليوم.. ويوم التفتت لوراها شافت امها وبنفس الوقت شافت امها دموعها.. فحاولت انها تمسحهم بكبرياء واضح...

الجازي: حور يمة
حـور: لا تحاولين ماما... (بصوت مليان غصة) خبري المطيعة اني ما بنتظرها هني طول اليـوم..
الجازي وهي تمسك بنتها اللي صارت بطولها: حور حبيبتي سمعيـني
حور ووهي مخنوقة: يمة ما شفتيه شلون يعاملني.. وشلون يعامل خواتي؟؟؟ ليش يعني؟؟ لاني ما ابي ادرس اللي يبيني ادرسه ولاني ما ابي اشتغل في مطعمه المقرف..
الجازي: المطعم المقرف هذا اهو اللي كببركم ووكلكم وحط سقف على راسكم يا حور.. لا تستهزأين باللي ابوكم يسوييه عشانكم..
حور: عيل سمعتيه شقال؟؟ انه يفضل بدورو علي؟؟ هاي السخيفة ام العبارات الذكية..
الجازي: يا حور انتي تدرين واكثر وحدة في خواتج بمحبة ابوج وعشقه لج
حور وهي تطالع الجهة الثانية بعيد عن ويه امها: يتهيأ لج...
الجازي وهي تسحب ويه بنتها: طالعيني لمن اكلمج.. (ولفت حور ويهها لامها بنظرة كسيـرة) انتي في هالبيت صاحبة الصوت.. انتي اللي تقدرين تغيرين من روتين البيت بسبب افكارج وتمردج.. لكن حطي في بالج.. ان بين التمرد وقلة الادب شعره.. وقت ما تنقص خلاص تتخالط الاوجه ويصير كل شي من غير حد ويجلب معاه نتايج سلبية..
حـور وهي تحس بالغصة مزحومة بها:.. بس يمـة انا ماقدر اكون مثل ما اهو يبيني.. ويقهرني اذا يبي يسيرني مثل ما يبي.. شوفي سرور؟؟؟
الجازي: شفيها اختج؟؟؟ اهي حابة اللي اهي فيه وعمرها ما كانت من النوع اللي يحب الدراسة وانتي ادرى بها لانها اقرب وحده لج...
حور: بس انا مابي اكون مثلها؟؟؟
الجازي وهي تبتسم وتمسك ويها بنتها من الجهتين:.. يا عمري انتي عمرج ما كنتي مثل احد.. كنتي طول عمرج البنت الفريدة.. Unique وعمرج ما انصعتي لاحد. وعمرج ما كنتي مأمورة من احد.. فما ابيج تتغيرين ولا تخلين احد يغيرج.. بس ابي منج شي واحد...
حـور وهي تنظر لامها الغالية بحنان:.. عيوني لو تبينها..
الجازي ووهي تبوس عيون بنتها وترد تطالعها:.. ابيــج تحاولين يا حور.. انج تبينين علاقة اقوى واشد احترام من هذي اللي تمر بينج وبين ابوج.. حاولي انج تكونين مؤدبة اكثر من جذي..
حــور وهي تناظر امها بلوم وتأنيب ضمير:.. اكيد زعل على كلامي له...
الجازي: ابوج ما يزعل منج لكن قلبه رقيق.. وخصوصا في هالفترة الحالية..
استغربت حور من كلام امها: شفيها الفترة الحالية..
تجمدت الجازي من نطقة لسانها .. شاللي ياب هالموضوع للسانها وجدام حور بعد:.. ها.. لا يمة بس اهو شوي.. يعاني من مشاكل في المطعم.. توسعة وما توسعة.. ولا تنسين بعد المصاريف الزايدة هالايام...
حــور وهي شبه مصدقة لكلام امها لان ابوها بالعادة ما ينطق بشي لمن يعاني من موضوع.. لكن من يومين ابوها بين انه بحالة غير طبيعية عن غير العوايد.. : بروح له واستسمح منه شرايج انتي؟
الجازي وهي تحاول انها تظهر ملامح طبيعية.. : اي حبيبتي... احسن شي تسوينه..
نسيم وهي طالعة من بيتهم تركض:.. wait for meeeee…
حور وهي تناظرها وتضحك: خبري الخبلة اني بروح وبيي..
الجازي وهي تبتسم لبنتها: اوكيــ
راحت حور وهي تركض لداخل البيت وقبل لا تدخل طلعت بدور وهي لابسة طاقية زرقا على راسها وشعرها الحريري معجف من الصوبين والنظارة طايحة على خشمها بصورة ناعمة وتبين مدى جمالها الحلو...

دخلت حور بيتهم اللي يسود فيه الاثاث الاحمر.. الاحمر والأخضر الغامق مع المذهبات اللي تطغي من الجو العربي في المكان.. وراحت لوين ما كان ابوها واقف ويا نووور في الحديقة... كل اللي سوته انها وقفت في ويهه وباسته على خده ويم اذنه همست بآسفة وطلعت من المكان بسـرعة.. وعلي يناظر خطاها وهو مندهش من حركتها واول ما التفت لجدامه يحاول يتناسى حركتها اللي كانت بمنتهى الحلاوة والظرافة وجزء من الطفولة اللي ما فقدنه بنات علي نظرا لمعاملة ابوهم لهم... فابتسم غصبن عنه وهو يعرف من اللي خلاها توصل الى هالشي.. والتفت عشان يروح للجازي لكنه لقاها واقفة وراه وحاطه يدها على جتفه العريض وتبتسم في ويهه.. فتدافع الحب العميـق اللي يحمله في قلبه لها من ازل الزمان.. ومعاه يتخالط الحزن ان يمكن هالانسانة يفقدها في يـوم.. فما كان منه الا انه يلمــها من جهة وحدة ويخليها تخبي ويهها في صدره الحنون.. وعيونه تحاول كبت دمع واظهار قوة عشان اربع من اخلص الحريم في هالعالم...
تابع الجزء الثاني

طلعت سرور من البيت قبل مناجر ابوها ويا حور وراحت لمكانها المفضل في العالم.. المطعم اللي ابوها جم مرة حاول يقنعها انها تفتح في وقت متأخر يوم الاحد.. وهي تتعلل له بجملتها العريـقة " يوم الاحد اهو اليوم اللي الناس تلتجي له الى المحلات العريقة اللي تقدر تخدم الناس بقلبها مو بدافع الكسب والمال.."..

كانت سرور تحمل في طيات ويهها ابتسامة دفينة وعميـقة من عمق الزمان وطوله.. ما كانت رشيقة مثل بطلات القصص الرومانسية.. او يمكن مثل خواتها.. كانت مليانة بشغف الضحك والابتسام الدائم.. صح ان وزنها يفوق ال70 كيلوو لكنها مليانة فرح ومو محتاجة للرشاقة عشان تخليها افرح.. وحبها للسكريات يتخطى اي حب او اي علاقة جنونية في هالزمن الغبي على حد قولتها.. تحب الطبخ والخبز واهم شي.. التزيين.. وتحلم انها في يوم تفتح لها محل خاص في كيك حفلات الزواج والمؤن الغذائية وخدمات الحفلات بمختلف مستوياتها واهميـتها..

وصلت الى المطعم واللفافة المزركشة على رقبتـها .. التفتت شوي وهي تتنسم من الهوا البارد اللي صدم رئتها بحلاوة ونقاء الثلج القادم.. وفتحت المحل ودخلت..

كان المطعـم مجدد من قبل اربعة شهور.. فاختلف الديكـور عن حالة السابقة وين ما كن عبارة عن حجيرة وحدة فيها اربع طاولات وكاونتر.. الحين صار يتكون من ثلاث حجيرات وكل حجيرة فيها خمس طاولات.. وبالاضافة الى بار صغير يقعد عليه شخص او شخصين مجابلين منظر نهر الهدسن والشارع والمارة.. وكانت حور تقعد عليه معظم الوقت اللي ترسم فيه في المطعم..

كانت الوان المطعم تتراوح بين الليلكي الناعم والفيــروزي العريق.. والصور للآلات العربية العريقة تغطي المكان.. بالاضافة الى راديو قديمـ حاطيـنه كنوع من الديــكور.. وصور من مزرعة الجازي وين ما تربت في حياتها قبل زواجها من علي.. ياما سألو البنات عن هالمزرعة لكنهم كانو دايما يخبرونهم انها صور خذوها من عند احد .. وانهم ما يعرفون شي عن احد..

كانت سرور اكثر وحدة تتسائل ان جان لهم اهل ولا لاء.. لانهم من وعوا على هالدنيا وامهم وابوهم وماما عايدة مجابليــنهم.. كونوا لهم اهل من الاصدقاء والزملاء والزبائن المعتادين..

حطت الجاكيت واللفافة على الشماعة اللي يم الباب وقعدت وهي تنتظر الكوفي اللي حطته على السخان تصب لها شي وتاكل وياه قطعة من الخبز اللي في الفرن المحتفظ بسخونته.. ويوم راحت للفرن تتأكد من الكيك اللي هناك سمعت صوت الجايلز الي عند الباب تعلن وصول احد.. فطلعت الصينية كاملة وطلعت من داخل.. وشافتهم ثلاثة.. بنت – والواضح انها بمنتهى الجمال- واثنين شباب بمنتهى الاناقة ولكن واحد منهم شكلـه مألوف بالنسبة لها ما تدري ليش..

سرور وهي تبتسم والغمازة العميـقة تظهر بكل حلاوة:..Good morning good people
حياة ردت عليها بمرح: very good morning actually
سرور عرفت انهم عرب ولكن بعد ما خاطرت انها تتكلم يمكن يطلعون هنود ولا شي: can I help you?? What would you like to have..
كايد أشر بيده بخجل: nothing for me
محمد اللي عرف سرور من غمازاتها لانه ما نساها ولا نسى معاملتها الطيبة وياه:.. انا ابي شي من الكيك اللي عطيتيني اياه ذيج المرة؟
سرور وهي مستغربة اول الشي بس بعدين ذكرت محمد:.. آآآآآآآآآه هذا انت.. انا اقول مو غريب علي هالويـه..
حياة وهي تضحك على محمد لانها فهمت الموضوع غلط: اكيد شفتيه على كفر مجلة new York society ولا شي ثاني..
سرور اللي ما فهمت لولا كلمة من اللي قالته حياة ردت بسذاجة: لاهو كان هني قبل جم يوم وكان يبي شي خفيف ويوم عطيتك الكيكة قلت لي ان عليك رياضة تسويها عشان تروح السكر.. صح؟
محمد وهو مندهش من ذاكرة سرور القوية:... ما شاء الله خوش ذاكرة..
سرور وهي تضحك بقوة:.. اذا ما ذكر جان تظيـع طلبات الناس..
محمد وهو ماخذ راحته وياسرور: بس عيل.. عطيني اللي عطيتيني اياه ذيج المرة..
حيـاة وهي متحمسة مثل محمد: وانا ابي شي حلـو مليان شوغر ومعاه كاباتشينو بالحليب..
سرور وهي تكتب الطلب وتنتظر من كايد انه ييطلبب: وانت متأكد ما تبي؟

لكن كايد كان سرحان وهو يناظر المكان.. وبالاخص الى اللوحة اللي على يمينه معلقة على الجدار بصورة المزرعة...

حياة ووهي تهزه من سرحانه:hello ارض الواقع يناديك..
كايد وهو منصدم ومنحرج شوي:.. سوري بس... الصورة عجبتـني..
سرور وهي تبتسم: ما تبي تطلب شي؟؟
كايد وهو يحس باصرار سرور : شي خفيف.. جاي حليب ولا كوفي بالحليب ووايد شوغر..
نسيم: comin in the way,,
محمد وهو منسحر باسلوب سرور: وايد طيبة وحليوة مووو؟؟
كايد وهو يبتسم له وحياة ترد عليه: اي والله .. وايد وايد وايد طيبة..
محمد وشعور غريب يطوف فيه تجاه سرور:. مادري ليش احسها... حنونة و..طيبة..
كايد وهو يمسك محمد من جتوفه ويضحك:you made your point وضحت رايك.. وايد طيبة ووايد حنونة.
محمد وهو يناظر كايد باستنكار : تحسني ابالغ..
حياة وهي تضحك ووتضرب يدها براسها: ياربي من هالريـال..

وكلها خمس دقايق ورجعت لهم سرور باللي طلبوه وكريمة الشوكولا على الكيك والكرواسون ساخنه وخلتهم يحسون بريجهم يسيل من الريحة الحلـوة..
سرور: house made and no fake ingredient
(صنع منزلي ومن غير مكونات مزيفة)
حيـاة: احلى شي..

كل واحد اخذ اللي له وبنفس الوقت دخلو كستمرية يداد ولكن كايد كان يتسائل عن الصورة المأخوذة لانها مألوفة بصورة فظيـعة:.. هالصورة تخص ممتلكات عائلية؟؟
سرور وهي اتناظر باتجاه للي يناظر له كايد: الصور هاي؟؟؟ لا والله.. الوالد ملاقيهم من عند احد.. وحطاهم كبارت من الديكور .. ولكن بسبب قدمهم هني في المكان نحسهم شي خاص بنا... مادري ليش.ز مع انهم صور
حياة ووهي تبتسم بحلاوة: اكيد مع العشرة الاشخاص والاغراض تصير جزء من ذاكرة الانسان وخصوصياته...

حس كل من محمد وكايد ان كلام حياة مبطـن او يمكن موجه الى ضمـير وعقل كايد.. الا انه رفضه بحجه انه ما يطلب شي اكثر من صداقة شريفة مع حيـاة..

انصرفت سرور الى خدمه الناس اللي دخلوا ومحمد ما يقدر يشيل سرور من عيونه.. يحسها مقياس للطيبة وللحنية في العالم.. غريبة ان اكووو ناس بمثل هالطيبة.. محمد معاني من نفس معاناة سرور.. التغرب وانقاطع صلاة واواصر العائلة.. الا ان محمد يعرف بهالعائلة على عكس سرور اللي تربت على فكرة ان امها ووابوها مقطوعين من شير..

تم كايد يناظر في الصـور وهو يحاول يطابقها بمزرعة ابوه الا ان ماكو اي مجال للمقارنـة.. كايد نفسه يعرف ان ابوه على خلاف مع عمته الوحيـدة بالعالم.. الا انه ما يعرف هالعمة من تكون والا وين راحت والا شنو صار بحياتها.. كل هالامور تعد من الضبابيات اللي تجتاح حياتهم كلهم عيال الجيـل اليديد من بعد جيل علي وحارب والجازي..

وكلها دقايق وينهز المكان بدخلة بنت وكانها قطعة من الجمال بغضبها المتقد... ووراها البنت اللي ما تخلت عن مخيـلة كايد ولا لحظة من اول ما شافها وتتبعها البنت اللي ترافجها..

حور وهي تسحب يد بدور: خذي جيسج ولا تتكلمين
بدور وهي تلتفت وويهها اشبه بجمرة متقدة من الغضب: لا تتجرأين وتلمسيني. وخذي هالجاكيت لج ما بيه
حور وهي مندهشة وتحاول تسكت اختها عن الفضايح: تعالي وياي ورى..
بدور: مابي برد البيـت..
حور: يعني شفيه الجاكيت (تطلعه من الجيس والوانه الباهية الزاهية ما تنطبق على شخصية بدور) آخر صيحة واخر موضة..
بدور وهي تحط يدها عند راسها: كفاية لونه اللي يخليني ادووخ..
حور: خذيه ولا تسوين لي مشاكل..
بدور وهي تخبي يدينها ورى: مابيه وانا بررد البيت..
حور: ما بتردين البيت الا وياج ...
بدور: مابي..
حور: يودي..

الا وبحور تسحب بدور معاها الى ورى الكاونتر ومن غير قصد تضرب ذراع كايد بقوة لدرجة انها فقدت توازنها.. تلاقت عيونها بعيـونه بحرج واضح اما كايد فما كان مصدق ان صدف القدر جمعتهم الى هذي المحطـة..

نسيم عرفت كايد على طول اما حوور اللي ما انتبهت له الا هذي المرة ضاعت في ملامحه وفي حياها وغضبها من بدور اللي عرضها لمثل هالموقفف:... انا اســفة. (شدت على عيونها وكانها تتدارك نفسها) I'm very sorry
كايد وهو يحاول يرد عليها بالكلام الصحيح لانه اهو الارتباك ركبه من راسه لريله:.. لا عادي.. اتس اوكيـه...

حنت حور راسها بعلامه احترام وسحبت بدور بقوة الى ورى الكاونتر وداخل المطبـخ..

اما حيـاة فناظرت البنات بقرف وكانها منزعجة منهم: what a brat
(صج وقحـة)
محمد وهو يشرب من الكوفي: مب قصدها..
حياة: شنو مب قصدها.. جذي يسوون فوضى في مكان عام؟؟؟ قلة ادب وواحترام..
نسيم تحركت من مكانها من بعد ما سمعت كلام حياة الحقير وتوها بتدخل المطبخ الا تلتفت الى كايد وتبتسم في ويهه بسذاجة:.. hello ( تتمتم شي بحلجها) we are very sorry

ابتسمت بعذوبه وناظرت حياة بحقارة ودخلت المطبخ.. اما حياة ففتحت ثمها من الصدمة ومحمد ضحك شوي.. لكن كايد ظل مرتبك من اصطدام حور فيه ومن قربها الواضح منه.. وكأنها شي خاص فيه.. قطعة منه ضائعة من زمن طويـل.. يحس بالاشتياق له وكان هاللحظة كانت عبارة عن التعويـض... هل هذا هو شعـور رومانسي من مشاعر العرب.. والا هاي فطرتك يا كايد نحو بنت عمتك الوحيـدة..

يوم كملوا الللي ياكلـونه دفعوا بقشيش استلمته منهم سرور وهي تعتذر: انا ووايد اسفة على الموقفف اللي صار.. بس هذول خواتي الصغار وتعرفون اي نوع من المجادلات بين الخوات تصير..
محمد بحبابة تصرفاته: لا عادي بالحل مهما كان... هذول صغار.. بس ان شاء الله تصالحو؟؟
سرور وهي ترفع حواجبها وتضحك بصوت متحمس: اذا تصالحوا معناته ان فلسطين لها امل بالتحرر..
حيـاة بصوت مصطنع: شكرا الكوفي كان حلو..
كايد وهو يشكر سرور بعاطفة كبيـرة تنتابه: مشكورة وعساج عالقوة.. ياختي..
طالعت سرور كايد وهي تحس بالحنية تجاهه وابتسمت له بصدق:.. الله يقويـك.. ياخوي..

مشى كل من كايد ومحمد وحياة وطلعوا من المكان.. وبطلعتـهم وصل علي ويا زوجته الجازي اللي تمت تمشي وهي ماسكة يد زوجها وبنتهم الصغيرة تمشي جدامهم بمرح مشهود له... وعيون كايد عليهم بالتهام مخيـف .. شي في ويه الأم والبنت الصغيرة خلى كل من ابوه وعايشة اخته يطلعون جدامه.. وشي في ويه الريال اللي مغطي الشيب راسه على الجوانب رجع له ويه حور الحماسي..

اول ما يات على باله حور شافهها طالعة من صوبهم .. وقفت شوي تطالع ابوها وامها اليايين وما كان منها الا انها تسلم بسرعة وتمشي ويا ارفيجتها اللي كانت عيونها على كايد ويوم انتبهت لحياة اللي تناظرها باحتقار طلعت لها لسانها اللي انخرق بدبوس فظي ولوعت جبد حياة.. يوم مشت حور ويا نسيم التفتت بسرعة الى وين ما المطعم وشافت عيون الريال اللي ضربت فيه اليوم بالغلط تناظرها وكانها تخترق روحها.. فالتفتت لها هالمرة وبصورة اطول من قبل.. وكانت عيونه ما زالت عليـها.. خافت حور من نظراتها وسرعت من خطواتها ويا نسيم .. بعيدا عن مطعم ابوها.. وبعيدا عن عيـون هالمراقب..

----------------------------------

وصل حارب ويا موزة اللي اخذها من الجامعة الى المزرعة بناءا على طلبها .. وخصوصا وهي الغالية العزيـزة اللي ما ينرفض لها شي.. كانت تبي تروح تشوف عبدالله لانه من يومين او اكثر قاعد في المزرعة.. بتتأكد من ظروفه ومن حالته.. خصوصا من بعد هواشه الكبير ويا امه هذاك اليوم اللي وصلها فيه للمزرعة..

اكتشف ان امه تبي اوراق من المزرعة تبين الملكية عشان تقدمها للبيـع او للاستثمار المربح في مجال السياحة.. لكن عبدالله اللي يعشق تراب هالمزرعة وما عمره فكر انه يخليها او يبتعد عنها للحظة انتابته نوبة الاعصاب القوية اللي تتملكه وتجادل ويا امه بقوة لمن طردها من المزرعة.. حارب درى عن الموضوع لان ابو رياض.. الزراع اللي يشتغل عندهم من اربعين سنة خبره.. ويا المزرعة عشان يتطمن على الأمور.. وعشان يرجع الى ذكرياته والى التراب اللي داسه اهو يوم كان صغير يملك يد اخته الصغيرة براحة يده ..

نزلت موزة اول شي وراحت على طول صوب الاستراحة اليديدة اللي كانت قريبة شوي من البيت العود.. دخلت البيت وهي تنادي على عبدالله.. شيلتها كانت مغطيـة اجتافها وومغطية شعرها زين لكن هيهات من طوله اللي تهادل على ظهرها من اول ما تحركت بسرعة وانفك عنه المحبس اللي بشعرها..

ظلت تمشي باروقة البيت البني اللون وتعببر بين الستاير اللي تطل على الشرفة الكبيـرة .. طلعت من اول باب زجاجي لانها انتبهت الى جمعة ناس عند الحلبة اللي تنحط فيها الفروس اليديدة المب مروضة.. واول ما شافت كان عبدالله فوق الفرس يحاول يروضها لكنها ما طاعت وما كان منها الا انها ترميه على الارض بقوة وسيف ولد خالها يضحك عليه وريـاض ولد الزراع يروح له داخل الحلبة وواحد ثاني هم مب غريب واقف.. وكان محد غيـره.. شاهيـن ولد خالتها ام سبيجـة.. الطيف اللي ظنت موزة في اايام مراهقتها انها تحبه.. لكن اختفى هالحب مع معرفتها ان لا حب قبل الزواج..

طلعت موزة وهي مغطية نص ويهها الى الشرفة وصوتت على عبدالله:... عبــدالله... عبـــدالله..

قام عبدالله عن التراب وهو يلتفت الى راعية الصوت فعرفها من خيالها البعيد انها موزة.. والتفت وياه كل من سيف (عاشق موزة) وشاهين... لكنهم غضوا بعيونهم يوم مشى لها عبدالله وجبينه وجرح من ورى اذنه ينزفون بشكل خفيف بالدم...

يوم شافت موزة ان اخوها ياي صوبها دخلت داخل البيت.. وكلها دقايق وعبدالله وراها..

عبدالله وهو مسكر عيونه من شدة الشمس:.. مويز؟؟ شتسوين هني؟؟؟ شيابج المزرعة؟؟؟
موزة وهي تناظر حاله اخوها وتمتعض منها...: شمسوي في روحك؟؟ ليش تخرخر دم من كل صوب؟؟
عبدالله وهو شوي يعصب: اوهووووووو شعليج دمي اهو ولا دمج؟ قوليلي شتسوين هني؟؟
موزة وهي معصبة عليه: لا تكلمني بهالاسلوب.. انا ياية ويا ابوي.. ياي يجيك على الحلال.. وانا ياية اجيك عليك.. اخوي.. من لحمي ومن دمي..
عبدالله وهو يهدي باله لكن يشغله بجية ابوه:.. ابوي ياي هني ليش؟؟ صار له سنة يمكن ما طب المزرعة..
موزة وهي تنادي على الخادمة اللي تسكن.:.. ماقدولين.. ماقدووولين..
تطلع الخادمة من المطبخ القريب: yes mama moza
موزة: bring the first aid box with some clean towel
(ييبي علبة الاسعافات الاولية وفوطة نظيفة)
ماقدولين:right away
راحت ماقدولين وعبدالله يبتسم في ويه موزة: بتنظفين جرحي؟؟؟
موزة وهي تعقد ذراعاتها عند صدرها وتناظرها بغرورها الجميـل:.. مو مثلك قلبي قاسي يقوى على منظرك.. تدري ان الجرح فيك يشيب اي قلب..
عبدالله: اوخ اوخ من قلوبكم يالعذارى.. ياليت واحد منهم صادق بس..
رفعت موزة حاجب متسائل: .. وشلك في واحد منهم؟؟؟ ناوي ؟؟
عبدالله وملامحها تمتعض بقوة: لالالالالالا... شنو ينـــيت.؟؟ يوم الحرام هذا اللي يحب فيه عبدالله ولا يتمنى قلب وحدة من البنات.. كلهم ما يسوون الا خواتي ..
موزة وهي عارفة بهواشه ويا امه.. وراحت وقعدت يمه على حافة الكرسي اللي ماعطهم ظهره:.. وامك؟؟؟
عبدالله يلتفت لها ولحيـته الخفيفة ملطفة من ملامحها الهادئة:... اهي اللي مطرشتج؟؟
موزة وهي تضحك في ويه عبدالله: انت ما تععرف ان موزة ما يطرشها احد لاحد؟؟ وتعرف زين ان امي اذا تناجرت وياك ما تعلم احد؟؟؟؟
عبدالله: عيل شلون عرفتوا؟؟؟
موزة والعلبة الاسعافات توصلها:.. ابو رياض خبر ابوي.. وابوي يا اليوم يطمن عليك..

[b]

عبدالله يضحك باستهزاء.: يطمن علي؟؟؟ ليش لا يكون مات ناصر..
حطت موزة يدها على حلج عبدالله بخوف: فال الله ولا فالك... هذا اخوك شلون تتكلم عنه جذي..
قام عبدالله من مكانه والم الغيرة يعتصر قلبه:.. هذا اخوج وولده.. مو اخوي..
موزة وقفت وراه: هذا اخوك.. واخوك.. واخوك... قببل لا تولدك امك وتولدني وراك.. وبيظل اخونا لحد اليوم اللي الله لا اييبه الا بعد عمرن طويل..
عبدالله وهو يلتفت لها:.. بيصير اخوي في اليوم اللي يكون لي في قلب ابوي مكان.. ومو اي مكان.. المكان اللي اهو مستحله..

طلع عبدالله عن موزة من الشرفة وهي ظلت واققفة مكانها .. هزت راسها بأسف وهي تفكر يحياتهم المتداعية.. تفرقات وعلاقات مهشمة مخبية ورى جدران من الذهب والعاج.. قلوب فقيرة بالحب واخرى غنية ولكن تمتنع.. اخوان ما يعرفون بعض او حتى ما يحبون بعض.. وين صارت هذي؟؟ باي زمن ولا بأي دنيا..

طلعت موزة من الاستراحة الى البيت العود.. وين ما مزارع الليمون والتين والخضروات منتشرة بروايحها العبقة.. وين ماتذكر كايد في ايام صباه.. يتجول بكسله وخموله بملابسه البسيطة الفضفاضة.. ووين ما كان عبدالله يجول بشقاوته .. ووين ما كانت امها تمشي في العصر وابوها في الصبـح البارز ويسهر بالليل البارد تحت نجوم الذكريات.. ذكرياته وهو صغير مع اخته اللي ارتدت على عائلتها وسافرت مع ريال اجنبي..

راحت موزة.. ولقت ابوها عند التنور اللي يصير عند مزرعة الليمون واققف.. يشم ريحة الخبز الناضج اللي سوته ام رياض من شوي.. كان واقف وهو رافع يدينه وكانه يتلقى الريحة بمحبة.. وثوبه الابيـض ينصع بلونه الطاهر.. وغترته ملمومه على راسه كلها.. وراسه مرتد الى الورى باسترخاء..

ابتسمت وهي تتقدم صوبه.. لمن وصلت عنده وحطت يدها اللي فضحتها برنه المضاعد الذهبية ..

التفت لها حارب وقال بطريقته الشاعرية اللي يتخالجه:.. كنا صغار يا موزة.. انا واالجازي .. ويدي ياسين يشيلنا في هالمزرعة...
كنا صغار.. نلاعب التراب يا موزة يا بنيتي.. وعمتـج ترسم اسمي في الدروب اللي نمشيها..
اعلمها كلمة الشمس... واعلمها كلمة الليمون.. واعلمها كلمة المزرعة..
لكنها ما كانت تكتب الا.. أخويــ حارب..
كنا صغار يا موزة.. نعرف وين كل منا عند الثاني... الا يوم كبرت الجازي.. واختفت عن عيوني.. وصارت لواحد ثاني..
موزة وهي تلم ابوها بحنان: وينها عمتي الحين يبا...
حارب وعيونه متغرقة بدمع الذكريات المرير:... بلعتها رمال النسيان يا موزة.. بلعتها.. وما عاد لها اي نفس... او لها نفس.. وانا ما دري عن مكانه...
موزة: تظنها مرتاحة؟؟
حارب وهويبتسم بحزن:... تذكرني بدمعها.. لكن بعد.. مرتاحة...

لم حارب بنته بحظنه وباس جبينها الناصع مثل الراية المخضرمة.. وتراجع وياها لبعيد عن البيت العود.. والعبرة تتجمع في حنجرة حارب وفي قلببه صدى اسم الجازي يعبر ويطوف بالخلجان الدموية فيه.. يذكر جمالها ويذكر سحرها.. ويذكر غرامها ويذكر حلمها.. يذكر يده ياسين اللي بارادته ابعدها عنه.. وخلاها جزء من الذكريات من بعد ما كانت اهي المستقبل الجميل.. وكله بسبب من ...؟؟؟

الله يسامح اللي كان السبب..
كل من علي وفاطمة زوجة حارب الثانية تحملو الذنب... علي.. لانه يا.. وسرق قلب الجازي.. وتمناها زوجه له وهو موقد مقامها.. وفاطمة..لانها ابعدت الجازي وخانت وصيتها وامانتها... ووسط ذكرياته عن الجازي تذكر ظبيـة.. ام ناصر المرحومة.. وتذكر حبها وكتمها لاسرار الجازي.. لوكنتي حية اليوم يا ظبية... جان حيا معاج قلب حارب.. وتحمل فراق الجازي..
او يمكن حتى ما كانت الجازي بتروح.. وبتظل معاه!!!

يا ترى..

اسرار الزمن الماضي.. اللي ما عادت منحلة.. اهي اللي مأثرة على الحاضر..
وياترى اصدامات الماضي بالحاضر.. لها موقع من الاعراب؟؟
حارب بيلاقي اخته مرة ثانية؟؟؟
كايد بيلاقي الأمل مرة ثانية؟؟
وعبدالله بيقدر يحب بنت من بنات هالزمان؟؟؟

كله يكمن في الايام اللي بتتسارع مع تسارع عقارب الزمن.. تكشف عن اوجه جديدة وعن اوجه قديمة مغطية بغبار النسيان مثل ما قال حارب..

الفصل الثاني
--------------

طلعت الجازي من العيادة وهي تفتح المظلة بعصبية واضحة وعلي اللي يتبعها مو عارف اهي شاللي ياها بالضبط عشان تتصرف بهالطريقة. وكانه يالس يتعامل ويا وحدة من بناته في العناد ولا الطيش.. ترفض اي نوع من انواع العلاج بحجة انها ما بتتحمل الاعراض الجانبية منها.. مع ان نسبة نجاتها زينة وناس وايد يتمنونها الا انها ترفض.وليش؟؟ بكل بساطة جاوبته..

الجازي وهي تلتفت له من بعد ما كان يناديها عشان توقفف وسالها عن سبب رفضها:.. اذا انت تتصور فكرة كوني برضى اني اموت ببطئ جدامكم انت غلطان
علي ووهو مستغرب: انتي سمعتي اللي قالته الدكتورة ولا لاء؟
الجازي والخوف يرعش جسمها:.. علي ... مابي اصير اللي اهي قالته..
علي وهو مو عارف اهي شتقصد: انج تكونين معافية مشافية؟
الجازي وشفاتها ترتعش:... لا..... مابي اصير..... مثل اللي اهي قالته... الضعف والكآبة والمزاجية...
علي وهو يهز راسه بحزن: بس هاي خيارج الوحيد يا الجازي.. عشان انج تعيشين لي اكثر ولبناتنا..
الجازي وهي تبعد ويهها المنزعج عن علي: بس مو بهالطريقة... ما ابي اكون عبء على احد..
علي وهو يسحبها من يدها برفق: يالجازي عيب عليج هالكلام.. انا زوجج مو واحد غريب
الجازي ووهي تحس بالحاجة الى شي اكبر من حياتها الحالية:..... ما قلت جذي.. بس....

نظرة العجز في عيون الجازي والاستغراب في عيون علي خلاهم يتوترون وتتحول الكهرباء والمحنة في دمهم.. الضياع وحرقة الاعصاب في البحث عن الحلول للخروج من المشاكل
اعلان النهاية امر صعب وبالغ في الأسى.. لكن علي والجازي تمالكو نفسهم واتفقوا اتفاق يمكن ما يقدرون يرجعون عنه.. لانه بيطهر النفوس من الغليان ويمحي صفحات الغيـض من كل الطرقـات.. ويشيل من الصدور اي ثقل واي حكم من غير معرفة...

بعد مسيرة مشي بسيطة قعدت الجازي على احد الأرصفة ويمها علي قعد وبهدوء استقروا مكانهم...
جال في بال الاثنين تقريبا نفس الشي.. او بالتقريب.. الحنين الكبير الى الأهل اللي بانت قيمتهم في هذا الظرف الصعب اللي ما يقدرون الا اثنينهم يواجهونه.. وبينت لهم صعوبة كونهم مجرد اثنين.. لاحول لهم ولا قوة في بلاد الغربة..

الجازي وهي تبتسم وكأنها تسمـع صوت حارب ويا يدها ياسين ووهم محتشرين على بعض..وعلي مسكر عيونه يتنسم رطوبة الخريف في نيويورك وكانها اول مرة نزل فيها ديرته من بعد غياب السنين الطويلة في ايام شبابه...

الجازي: تذكـر يا عـلي... تذكر يدي ياسين... وتذكر مزرعتنـا... والخبـز اللي ينعجن في الصبـح..
علي مباشرة ابتسم وكأن هالذكرى تدغدغ فيه مشاعر الطفولة والصغر..:.. تذكرين البنت اللي طلعت جدامي وهي متروسة عجيـن من الراس الى الريل..؟؟
الجازي وهي تهتز بضحكة خفيفة:.. صج تفشـلت هذاك اليوم..
علي وهو يلتفت لها بجاذبية الرجل العربي: تفشلـتتي؟؟؟ ليش تتفشلـين.. كنتي احلى بنت يمكن جافتها عيـني في ذيج الفتـرة..
الجازي وهي تناظره باستغراب: ذيج الفترة؟؟؟ ليش الحين تغير؟؟
علي وهو يمثل باللعثمة.. والجازي ضحكت عليه وهو ضحك بعد:.. تدرين انج اجمل بنت جافتها عيني. وتجوفها.. وبتظل تجوفها... (تهجد صوت علي وهو مغضن الملامح) شلون بقدر يالجازي.. بحق ربج العزيز شلووون..
الجازي وهي تحط اصابعها الدافية على حلجها تمنعه من الكلام:.. لا تقول شي... لا تفاول..مالنا طاقة على المفاول يا علي..

سكت علي ونزل راسه وهو يناظر الرصيف المبلل تحته ويبعد عن باله اي شي يخليه يفكـر..

الا وصوت الجازي يطغي عليه : قوم...

وكانت واقففة جدام ويهها والنشاط يعم ويهها..

علي وهو يوقف لها:.. وين؟؟
الجازي ووهي ماسكة يده بحنان: خلنا نروح... نروح مطعمنا.. ونروح لبناتنا.. ونروح لحياتنا.. نروح للدنيا اللي بنينها بفرح واذا كنا بننهيها او نقصيها نقصيها بفرح اللي تعودنا عليه... اللي عودتني عليه يا علي...

سكت علي وهو عاجز عن الكلام.. لكن ظلت يده اللي تقودها خطوات الجازي المرحة والنشطة .. ولو كانت عارفة باللي يمر في باله ما كان بتصدق.. لان علي مل من هالدنيا اللي بنوها بالوحدة والابتعاد عن الأهل..
في بال علي الجازي كانت لازم ترجع لديرتها ولاهلها وناسها.. اذا اهو ماله اهل مو معناته اهي لازم تخسـر اهلها.. والجازي لازم ترد وتعدل من امورها وترجع العلاقات الى نصابها.. واذا وقف في ويهه حارب او زوجته.. راح يواجهون شي اكببرر من الزواج من الجازي غصبن عنهم والهجرة ..

ظلت هالفكرة في بال علي .. تتطور.. وتتحمس في نفسه الى ان تحين اللحظة المناسبة عشان يخبرها..

-------------------------

كانت حور قاعدة في مرسم الجامعة وهي متحمسة.. الحين بيي خلف عشان يعطيها يكلمها عن الرسمة اللي يحتاجها منها .. وهي في بالغ الحماس والتوتر يمكن.. مثل هالشي انه يصير لها وبالنسبة لهالانسان اللي قدر يحتل من اهتمامها القدر الكبير شي يعني لها الكثير.. يمكن تكون نهايته حلوة وخياليه مثل اللي رسمتها لها نسيم من اول ما طلب منها خلف هالطلب..

كانت تدقدق باصابعها على قطعة الخماس وبقايا الصبغ متيمع في زوايا اظافرها الباهتـة.. واكمام قميـصها البرتقالي مرفوعة الى تحت الكوووع والعروق مختـفية تحت بشرتها السمـرا الخفيفة.. وشعرها مرفوع الا من خصلات متسللة على ويهها وورى رقبتها.. عيونها كانت لامعة بالحماس ولكن شفاتها ترتجف يا من البرد يا من الاشتياق..

الا ودقات على الباب تطفرها من مكانها غصب عنها..

كان خلف وهو لابس نظارته الطبية وشكله منحرج: اسـف حور ما كان قصدي افزعج
حور وهي متوترة وتتحرك برجفان: اهلين خلفف لا عادي.. بس لان المكان كان خالي من جذي... شلونك؟؟؟
كانت ويهها يلمع من الحماس والتوتر بينما خلف هادئ وقابع مكانه عند الباب : الحمد لله ابخير انتي شلونج؟؟ وشلون الدراسة؟
حور: excellent thank you

تموا شوي ساكتـين وخلف يناظر اللوحات اللي كانت تعبر عن الروعة والتميز في المرسم..

خلف وهو مقدر الجمال في اللوحات: beautiful
جان تفهمها حور غلط وتبتسم باحراج: thank you

خلف فتح ثمه باستغراب وشافت حور يده مأشرة على احد اللوحات المعلقة وكانه يبي يفهمها ان اللوحة جميلة ومب اهي .. وما كان من الدم الا انه يغطي ويهها بدفق كبير..

حور: اسـفة كنت اظن..
خلف وهو منحرج من نفسه ويبرر: لا لا... مو قصدي.. يعني.. حتى انتي... you know
حور وهي تلتفت وتعطيه ظهرها وهي ميتة من الاحراج: لا عادي لا تجاملني..
خلف ووهو يمشي وراها وبنيته انه يصلح سوء التفاهم: لا صج حــور.. (التفتت له بهدوء) انتي بعد.. جميـلة..

لمعت عيونها من الصدق للي ظهر في نبرة صوته... وهو ابتسم ووطى راسه..

حور: وينها الصورة اللي تبيني ارسمها..
خلف من سوء التفاهم نسى : صورة؟؟ اي اي صورة.. (تدارك نفسه لكن الاحراج اخذ منه مأخذه وحور ابتسمت عليه في ظنها انه منحرج من تواجده معاها) الصورة معاي... في احد الكتب (وهو يدور في جنطة الجتف اللي حاملها) لو بس القاها الحيـن..
حور وهي تحس انها مسكت دفة الموقف تصرفت بهدوء: لا تستعيل دورها على مهل...
ولقاها خلف ومداها لها:.. كاهي الصـورة..

كانت في ظرف بني رسمـي.. وقبلل لا تفجه حور..

خلف: بس ابي منج وعد يا حور..
حور وهي تناظره وفي عيونها الاف الوعود لخلف : امر..
خلف وهو يبسم باحراج: ما يامر عليج عدو... لا احد يشوف الصورة اللي عندج... اهي صورة شخص عزيز علي و... له مكانه خاصة في قلبي..
حست بالغيرة البسيطة حور والحسد الخفيف وتمنت لو كانت اهي صاحبة الصورة:.. لا ما عليك ..لا تحط في بالك.. تراني اعرف قيمة الاحباب..
خلف: بارك الله فيج... ما ظنيت فيج الا هالشي..
حور وهي تطلع الصورة من الظرف:.. ما عليك زود..

وضحت الصورة عندها لبنت في منتهى الجمال والرقة في الملامح... صورة احترافية تبين مدى جمالها العريق وحلاوة الجمال العربي في حناياها.. كانت خصلات شعرها الحريري تغطي جبينها ويدها المليانة بالحنة مرتاحة على خدها وابتسامتها المغطية بحمرة الورد وسواد الليل يلف جفونها...

غيرة اعتصرت قلب حور ورفعت عيونها بابتسامة خايفة في ويه خلف وومن نظرات حور فهم خلف وابتسم..

خلف: حلـوة؟؟؟
حـور وهي فاقدة انفاسها من التوتر المتصاعد فيها:... وايــد ماشاء الله عليها.... اختك؟؟
ظحك خلف وهو يتمايل بزهو لان حور مدحت البنت:.. لا ويــن...مو اختي هذي... هذي سيدة هذا.. (وهو يأشر على قلبه وحور قلبها وقف عن النبض).. خطيـبتي..

طنين الصمت خرق طبلة حور وعيونها الواققفة بجمود في ويه خلف تشوف ان شفاته تتحرك بالكلام وكانه يقول شي لكنها ما قدر تسمع الا الخفقان البطئ في صدرها الناتج عن قلة التنفـس.. احراج اهو؟؟ ولا فشيـلة.؟؟ ولا خيبة امـل.. ولا شي مذبوح؟؟؟ كل هذا يصيبها في لحظة وحدة لمعرفة حقيقة للشي الوحيد اللي يمتعها في هالدنيا؟؟؟

خلف وهو يناظرها بابتسامة الزهو : وجذي.. قبلوا فيني اهلها واخيـرا وخطبتها..
حور وهي تبتسم للصورة المبهتة بسبب دموعها المتيمعة:.. الله يخليكم لبعض..
خلف وهو يتجدم من حور لانه حس بالألفة لها.. : انا ما ائتمنج عن هالشي يا حور الا لانج اخت عزيزة وغالية ولج من الجوارح زاوية..
حور وهي تناظره باشفاق على نفسها:.. الله يخليك ويعزك..
خلفف وهو يتجدم منها وبعيونه نظرة تحذير وتذكير: ترى ها مثل ما قلت لج.. الصورة هذي ما تطلع لاحد.. تخلينها عندج لمن تفرغين من اللوحة وتسلميني اياها..
حور وهي تبتسم بمرارة وتتمنى غياب خلف في هاللحظة:.. ولا يهمك.. بس انا الليلة ما بشتغل عليها..

وراحت لعند اللوحة تشيل الجاكيت اللي لابسته ولاحظت انه مخروق عند فتحة الرقبة وحاولت تغطيه بالشال اللي عليها

خلف وهو واقف وراها عند الباب: وبترسمينها هني؟
حور وهي تكلمه من ورى ظهرها: لا اكيد.. برسمها في البيت.. (تلتفت له بشكل سريع) مايصير بعد البنت متزوجة..
خلف: هذا كان ظني فيج يا حور... ما تقصرين والله.. بس متى تخلصين منها..
حور وهي تناظره بابتسامة: اسبوع او اقل.. تبيها بيرفكت صح؟
خلف: استغفر الله.. الكمال لله يا حور..
حور وهي تهمس: استغفر الله... بس عيل.. انا بمشي الحين _(وهي تشيل اللوحة القماشية تحملها وياها) واشوفك مرة ثانية انشاء الله
خلفف وهو يعرض مساعدته: خليني احمل عنج اللوحة
حور وهي تمتنع بقوة: لا لا... انا بحملها بروحي.. متعودة احملها... شي عادي بالنسبة لي..
حس خلف ان حور تبي تطلع فعيل من تحركه في المكان: بس عيل اشوفج على خير باي..
حور وهي تنطق بصعوبة وبصوت مبحوح: بـاي..

راح خلف من المرسم وظلت حور واقفة مكانها وهي منكسة راسها من شدة الحزن اللي فيهـا.. راحت لعند لوحة مفاتيح الكهربا وسكرت الانوار والاضواء وسكرت الباب وطلعت من المرسم.. وهي حاملة اللوحة القماشية وبيدها الثانية الظرف اللي فيه صورة خطيبة خلف...

جرت نفسها طول المسافة وهي تمشي لحد ما وصلت الى محطة السابواي.. نزلت ووقفت وكاهو القطار اييها.. ركبته وهي تحس بالغثيان لراسها.. ما دمعت عينها لحظة..كانت مغرورقة لكن اثرت الصمت على البكاء.. حطت الصورة في جنطها بسرعة وكأنها جمرة تلمسها.. وظلت واقففة لزحمة المكان ولكن ريلها ما كانت تشيلها للوقفة.. تهاملت اكثر من مرة على نفسها منهارة لكنها وقفت مكانها.. شكثر اهي محتاجة لاحد في هاللحظة.. واكثر من طرى على بالها كان ابوها.. اللي على طول منعها من هالامور وكلمها عنها وابعد عنها الاذى الا انها كانت اعند من هالشي.. واول ما طلعت من القطار ظلت تمشي لمن ضربت في جتف احد وانهارت على الارضية المتوسخة وعلى ويهها..

الشخص اللي دعمها كان في منتهى الاحراج وظل يتأسف منها: I didn't mean it I'm very sorry I wasn't looking are you okay?

الصمت لف شفايف كايد يوم شاف البنت اللي دعمها .. كانت البنت اللي في الساب واي هذاك الصبح واللي في المطعم بهذاك اليوم.. ومثل ما تصادمت وياه في المطعم ذيج المرة تصادمت وياه في المحطة

حور وهي تقوم نفسها باحراج بالغ والاسى مرسوم على ويهها بانحناءة ثمها الحزين: it's ok I'm okay don't you worry

واهي بعد انتابتها صدمة يوم شافت الانسان اللي ضربته.. كان في عيونه شي من الاندهاش والألفة اللي تحسها لمن تشوف احد من اهلها او امها تقريبا.. ومرت في بالها ذكراه في المطعم هذاك اليوم...

كايد اللي مو متعود على هالمواقف حمل لها لوحة القماش وهي واقفة: تفضـلي..
اخذت حور اللوح من عنده وهي منزلة عيونها: شكرا..

ومشت حور عن كايد وهي تحس بالكره لنفسها على غبائها.. وكايد ظل واقف وراها يراقب خيالها وسط الزحمـة الخانقة في المحطة الضيقة.. لمن اختفت تماما عن ويهه.. وهو اللي كان بيروح لمحمد في المكان اللي مواعده عليه ظل واققف مكانه محتار ما بين محطته والمحطة المفاجاة له.. ناظر المكان اللي طاحت عليه حور وهو يسترجع الذكرى في باله.. ولكن انقطع كل شي عن فكره يوم شاف حرف الH الذهبي الموصول بسلسلة ذهبية مرمي على الأرض.. وكأنه العذر اللي يسمح له انه يتبع حور ويعطيها هالشي ويشوفها للمرة الثانية باليوم..

وعلى طول سحب السلسلة ورفع تلفونه يتصل في محمد ويعتذر..

محمد بهمس وسط بلبلة السوالف والاحاديث: وينك انت؟؟؟
كايد وهو يطلع من الساب واي: ماقدر اييك محمد انا اسفـ.. اعذرني بس شي طرى علي..
محمد وهو يحس بالعجز: وعدتني يا كايد؟؟ مافيني اظل هني طول الوقت.. (يطالع ساعته الانيقة) صار لي عشرين دقيقة وانا زهقان اولريدي..
كايد وهو مستحيل يتنازل: اسف محمد بس الشي الليي طرى وايد مهم.. اشوفك باجر في المجلة باي..
محمد: بس كايد..

سكر كايد التلفون وظل يمشى الى الدرب اللي حفظة .. درب الكافيه اللي يلاقي فيه شي من نفسه كل ما يروح له او يمر عنده.. في امل انه يشوف حور مرة ثانية
-----------------------------------

في حفل الحنا الصاخب كانت حياة تدور بين المعازيم وهي في اوج حلتها وجمالها .. روحها الجميـلة تاخذ عقل كل الامهات اللي يتمنونها زوجة لعيالهم الاطباء والمحاميـن.. والمجتمع الباكستاني اللي اهي تعيش فيه لكون امها من هالجنسية يخليها محط اهتمام من صغرها الا ان حبها الكبير لكايد في قلبها يحجز قلبها عن الموافقة على الزواج.. اختها الصغيرة بتتزوج قبلها وللانسان اللي تمنوها له من كانت صغيـرة.. حياة مستحيل تقبل بالزواج المدبر والمجهز.. وتتمنى لو انها تتلوع بحبها لكايد على انها تكون زوجة انسان تحبه مع الايام..

الألوان كانت مترامية مثل الامواج في ذيج القاعة ذات السقفف ووالجدران الزجاجية في بيت حياة.. تعكس الليل الجميـل الممطر في سماء نيويورك والحلل الانيقة والاالوان الزاهية تنعكس بالعيون واصوات المصوغات العريقة والانتيكية تتمايل بحركة اليد او حركة الرجل بالخلاخل..

كانت حياة لابسة الزي الباكستاني اللي عبارة عن سروال وسيـــع باللون البرتقالي الناصع وقميـص طويل للركبة ظيج بفتحتين كبار.. كانت يد القميـص توصل لنص زندها والشال الطويل المخرز باجمل الوان الاحمر العاطفي والبرتقالي الزاهي.. وبقع من الاخضر على القميص تعكس جمال بشرتها السمرا وعيونها الفاتحة.. كان شعرها مفتوح على شكل التمويـج شبه المبلل وطقمها ذهبي نحاسي باحجاز حمرا واساور متدلية منها سلاسل بنفس نوع الحجز الاحمر..

قعدت يم اختها اللي لابسة لباس هندي احمر وتتحنى بنقوشات رائعة... وفيروز تناظر بنتها الكبيـرة (ام حياة) وتتكلم ويا اختها..

فيـروز بعربيتها القوية والفصيحة:..صدق اللي قال.. حياة بجمالها ما لها اي منافس..
رفعت: .. الحين جميلة العروس وحياة الجميلة؟؟
فيروز وهي ترفع شالها على جتفها وتناظر اختها: انا عمري مافرقت بين الثنتين ولا بين اخوهم.. الا ان حياة تمتلك من الجمال اللي يأسر عيوني كل ما اشوفها..
رفعت: ماخذة جمالج يا فيروز
فيروز وهي تناظر بنتها وتشوفها شلون تضحك وتناوش اختها: يمكن.. بس حياة جمالها خاص.. ياليت بس تتزوج وتخليني افرح بها..

وبوقت ثاني من ذيج الليلة كانت حياة في غرفتها تبدل ثيابها بملابس اخف عشان اهي تتحنى بعد.. ودخلت عليها امها اثناء ما كانت تفصخ المجوهرات اللي عليها

فيروز وهي تبتسم لبنتها وتستلم عنها العقد: خليني انا بشيلها عنج..

ابتسمت حياة في ويه امها لكن لحاق امها بها وراه سبب ثاني..

فيروز: شكثر فرحانه اختج موو؟؟
حياة وهي تبتسم: الله يهنيها ان شاء الله.. وان شاء الله يسعدها محمد..
فيروز وهي تلم راس بنتها الى عند خدها: الفال لج يا يمة..
حياة وهي تمسك يد امها اللي كانت عند رقبتها: ان شاء الله..

انتهت فيروز من عقد بنتها وراحت وحطته في علبته المخملية...

فيروز وهي تكلم حياة من ورى ظهرها:.. كايد شلونه؟؟؟
انتبهت حياة الى امها باستغراب.. شياب كايد على بالها: الحمد لله ابخير.. يسلم عليج
فيروز وهي تبتسم لان وجود كايد في عائلتهم يسعدها: الله يسلم عمره من الشر.. عزمتيه على زواج اختج صح؟؟
حياة وهي متجفته وتناظر امها بتحري : اكيد... يمة؟؟
فيروز وهي تههم: اهممم..
حياة: شياب كايد على بالج؟؟
انتبهت لها فيروز وهي تتصنع الاستغراب: شنو شيابه؟؟ هذا بحسبه ولدي يا حياة.. وانتي ادرى بهالشي..
حياة وهي تضحك على امها: ان جان اكو شي انتي ما تبرعين فيه يا يمة اهو الاستغفال
فيروز وهي تناظر بنتها بغضب جميل : شقصدج؟؟
راحت حياة لعند امها ولمتها وهي تناظرها:.. قصدي يا يمة ان سؤالج هذا وراه شي ثاني..
فيروز وهي تناظر بنتها وتغير الموضوع: انتي اصلا ينيتي.. طالعي غرفتج انتي معفوسة فوق تحت.. جميلة اللي اهي العروس غرفتها مو بهالصورة..

وراحت فيروز تشيل احد الشالات اللي كان متعلق بحافة السرير ومفروش على الارض بصورة رومانسية.. وكان بها شوية من الغضب اللي تتميز فيه اذا كانت محرجة..

حياة بحزن.. : يمة كايد بعده مثل ما اهو.. وانا ما ااتوقع منه شي..
وقفت فيروز بخيبة الأمل وهي تناظر حزن بنتها الجميل اللي غطى امارات الجمال:.. وانتي لمتى بتظلين معلقة بهواه؟؟؟
حياة وهي تلتفت عن امها تخبي عصيانها:.. لحد ما ينتهي حبه في قلبي..
فيروز وهي تروح لبنتها وتوقف في ويهها: حياةة..انا ما يبت بنات وربيتهم وكبرتهم وسهرت عليهم عشان يظلون عازبات لي؟؟؟ (حنت نظراتها يوم شافت الحزن على ويه حياة) يا روحي انتي ادرى اني احلم فيكم عرايس من يوم كنتوا في المهاد.. لا تحرموني من فرحتي يا حياة..

حياة وهي ساكتة وتلف بويهها عن امها وترجيـتها اللؤلؤية تضرب في جتفها ..

فيروز وهي تمسك بنتها من زنديها وتبتسم في ويهها:.. يايمة.. ساعات المخبى في كتاب القدر.. احلى واجمل من اي قصة حب يعيشها الانسان.. وانا ما ابي اقسى عليج لو اقول..ان حبج ماله امل.. لكن هاي الحقيقة يا يمة..
حياة وهي تناظر امها بحزن والدمعة تلمع بعيونها:.. لا تقوليلي هالكلام يا يمة.. قوليه لقلبي.. اللي ما يفهم

ناظرت فيروز بنتها بحسـرة على شبابها.. اللي بينهدر في حب انسان ما يبادلها حتى الحب.. لانه لو بادلها بيكون الموقف اسهل..

فيروز: اتمنى لج يا يمة الزوج الصالح اللي يعرف لجيمتج ويقدرج ويحطج على راسه تاج ما يتمنى غيره..
حياة وهي تلم امها: ادعي لي يا يمة.. ادعي لي اني القى كايد.. ترى دعاء الامهات في حق عيالهم مستجاب..

وبجذي.. انتهت ليلة الفرح بحنا جميلة بدموع بنت وامها على قلب يتمنى انه ينحب في هالدنيا.. وينقبل..
--------------------

كانت الساعة 11 بالليل والمطعم على وشك انه يسـكر.. علي والجازي مشوا من زمان وظلت سرور ويا بدور اللي تتدافع من النوم الي فيها يشطبون حسابات اليوم..

سرور وهي تحسب في الدفتر:.. ويا مصاريف القهوة والعيين.. راح يصير...(تناظر بدور اللي نازلة نظارتها على خشمها ومسكرة عيونها) بدووور
بدور وهي ناقزة مكانها: شنووو سرور شنوو؟؟؟
سرور: شفيج يالسة احسب وياج وانتي في خببركان؟؟؟
بدور: يا سرور ما يصير جذي ووالله كل يوم اتصيدني في هالحزة وتقيسين ذكائي .. انا البطاريات خلاص عطبت فيني والرقاد راكب جفوني..
سرور وهي تبتسم لاختها: فديت عيونج انتي.. خلينا نكمل حسابات يالله وبلا دلع..
بدور: اوووووووف.. متى بس ادخل الجامعة وافتك من هالحسابات..
سرور: حسبي يالله لا كفخج..

الا وحور تدخل عليهم المطعم وويها معصوف من المطرالخفيف اللي نزل عليهم.. وعيونها كانت متروسة دموع وتهمل لاول مرة من شافت سرور اختها.. وحست ان لحزنها مكان في قلب غير قلبها..

سرور مستغربة من حاله اختها: بسم الله الرحمن علامج حور؟؟ شفيج؟؟
حور وهي تسحب اللوحة من وراها وشعرها يقطر ماي وهي تبجي:... طلع متزوج سرور... طلع متزوج ويحب زوجته وايد... سرور ابي اموووت.. ابي امووووت سرور..

سرور اللي تعرف باللي يمر في قلب اختها اشفقت على حالها ولمت اختها في حظنها .. وحور من ألفة جو اخواتها ما قدرت الا انها تعبر عن اللي بخاطرها كله.. وبدور بعد وقفت يمهم الا ان طبيعتها المنعزلة منعتها من مد يدها صوب اختها واكتفت بس بنظراتها الجميلة المواسية لحال اختها.. وكايد اللي كان يتبعها وقف ببرع وهو يناظر الاخوات الثلاث متلايمين على بعض.. واحساسه بالقرب منهم ملك كل وجدانه.. وحس بالرغبة بحظن وحدة من خواته الثنتين وحتى اخوه عبدالله.. الا ان الظروف كانت اصعب منهم كلهم ومنعته من التقرب منهم وتكوين العلاقة اللي يتمناها..

وفجأة بعيونه شاف النار اللي حرقت ظهره قبل 7 سنوات.. وهالمرة كانت محايطته من كل جهة ومن كل جانب.. وبعرجه مشى بعيد عن المكان وهو يهرب من هالنار اللي تتقرب منه حتى ما هلك الهوا البارد رئتينه وابعدته هالنار عن مطعم اهل عمته..

وصل كايد البيت وهو مكفهر ومعصوف الخاطر.. راح داره وظل واقف عند المنظرة يناظر نفسه.. شكله طبيعي وخالي من العيوب.. وبعصبية قوية ويأس شديد فصخ ثيابه بسرعة لمن تعرى النصف العلوي وبانت تشوهاته الكبيـرة.. وكانه يشوفها لاول مرة

صرخ على نفسه بالمرايا:... هذا انت... انسان مشوه.. مليان عيوب.. غير طبيعي... غيـر طبيعي...

سحب الاباجورة ورماها على المنظرة لمن طاحت وصارت فتات وشقوق على الجدران.. وانقسمت صورته المعكوسة الى اجزاء متفرقة ومهشمة ومجروحة.. مثل ما اهي حياته وسط هالغربة... قعد على الارض وهو ماسك راسه بيدينه ومباعد ريله من الجانبين.. متأسف على الدرجة اللي وصل فيها.. ومحتاج الى حظن يلمه .. الحظن اللي بيرده الى حاله القبلي..

------------------------------

بعد يومين من هالحالة ظلت حور في البيت وما ترددت على الجامعة بحجة المرض اللي بالفعل كان باين عليها.. والجازي اللي كانت تواجه ظرف اصعب من حالة بنتها النفسيه الا انها قعدت معاها وحاولت انها تعرف منها اللي قالب حالتها بهالطريقة .. لكن حور كانت اغلق من انها تتكلم لامها عن موضوع مثل هذا.. وسرور اللي كانت بتتكلم لاكثر من مرة وقففتها بدور عند حدها ومنعتها بحجة ان هالشي خاص بحور وحور بس..

علي كان مشغول البال لايام في التفكير بمسألة الرجوع الى الديار وترك الغربة للأبد.. ارجاع الجازي لاهلها والبنات لاصلهم.. الا انه كان صامت معظم الوقت عشان ما يأثر على احد بقراره هذا..

حور كانت في الغرفة وجدامها اللوحة البيضة تحاول ترسم فيها الا ان غيرتها منعتها من النظر الى الصورة مرة ثانية.. نسيم يوم شافت الصورة ماشافت الجمال اللي شافته حور وتمت تتطنز على الصورة معظم الوقت وهي ناسية انها السبب في صدمة حور الكبـيرة بسبب الصورة الوردية اللي تمت تشحن دماغ حور بها لمن صدقتها حور..

ظلت قاعدة مكانها وهي تناظر اللوحة وفي بالها احداث هذاك اليوم.. ويه خلف ومشاعره اللي بانت في كلامه عن هذيج البنت.. وعن المطر يوم يغطيها بدموع الغيم.. وبدت يدها في الحركة.. الا ان نور دخلت الغرفة وهي تطل براسها الصغير من فتحة بسيطة..

ناظرتها حور بابتسامة وكانها ما شافت نور من فترة طويلة:.. تعالي نور.. دخلي..
نور وهي تطل ببنيتها كاملة: عادي ادخل؟؟؟؟
حور وهي تاشر لها بعيونها: حياج حبيبتي..
دخلت نور بملابسها المرتبة وشعرها المسرح بطريقة مرتبة وقعدت على سرير حور اللي اهي تحبها وايد لكونه مليان بالألوان والاوشحة الملونه:.. انا احب اشوفج وانتي ترسمين..
حور وهي تتكلم بمرارة: كل مرة ارسمج الا اليوم مادري ليش ماقدر ارسم..
نور بمرح: ببتسم لج ورسميني يمكن تطلع الصورة حلوة
حور وهي تبتسم بمرح اكثر: دايما تطلع صورج حلوة يا حبيبتي..
نور: شنو بترسمين اليوم؟؟
حور تذكرت ملامح البنت اللي بترسمها ومدت يدها الى الظرف اللي كان على طاولة الزيوت والفرش.. ومدته الى نور عشان تناظره: شوفيها ..

اخذت نور الظرف ووفتحته وبعيونها بانت الدهشة من جمال البنت.. تمت تحدق فيها لفترة لكنها مسرع ما رجعت الصورة وملامحها عادية الى اختها..

نور: انتي وسرور احلى منها... حتى بدورو الكريهة احلى منها..
حور وهي تناظر اختها بغير تصديق: لاننا خواتج تقولين جذي..
نور: لا والله.. انتي وايد حلوة حتى ادوينا (ارفيجتها) تقول انج وايد حلوة ولو كنتي اميركية جان بتخلي اخوها براين يتزوجج..
وما كان من حور الا انها تضحك...: والله عليج سوالف انتي ويا ادوينوو؟؟ شوفي خلي عنج هالسوالف زواج ما زواج بعدج صغيـرة..
نور: انا مو صغيرة انا مراهقه.
حور وهي تناظر اختها بصدمة: لا والله؟
نور: اي والله.. من صجج انا عمري ايي 12 سنة الحين.. وكلها جم سنة واصير قدج..
حور: لا والله.. اقول.. قلبي ويهج يالله..قالت شنو قالت مراهقة.. يالله روحي بعدج ما عدلتي شعرج بروحج ومراهقة طايحة لي..
نور وهي تمشي بزهو: قولي اللي تقولينه.. انا جريب بصير مثلكم انتي وسرورو وبدورو.. واحلى يمكن بعد..

طلعت نور من الدار وحور مستغربة من اختها واكثر من هذا مستغربة من درجة النضج اللي اهي فيها.. صج انها كبرت وبدت تصير حرمة مثلهم..

حور وهي تكلم نفسها: كبررت ليش؟ عشان اتطاول وتصير مغرورة ومعتدة بنفسها؟؟؟
سرور اللي دخلت الدار: مثلنا كلنا.. (وهي تطلع لسانها لاختها بشقاوة)
حور وهي تبتسم بدهشة: هاي نورو متى كبرت؟؟؟
سرور وهي تنسدح على السرير: من زمــان.. هاي انتي اللي ماتقعدين في البيت ولا تدرين بالي يصير..
حور وهي تتذكر بحزن وتبعد الشعر عن ويهها لورى اذنها:.. كله صار من الماضي الحين.. كنت غبية.. ومافكر زين.. وماسمع الكلام الصح... تصدقين سرور؟؟
سرور وهي تناظر اختها اللي منعكس عليها ضوء الشمس الخافت.. : شنو ؟؟
حور وهي تناظر الضوء الطالع من الدريشة:.. ابوي عمره ما نصحنا نصيحة الا وكانت في مصلحتنا.. علمنا اشياء وايد صح.. واحنا نرفض نسمع كلامه..
سرور وهي توقف وتروح لعندها: انتي ياحور.. لكن شوفينا كلنا.. نسمع كلام ابوي وكلنا تقريبا نمشي في نفس الدفة الاانتي.. فيج شي من التمرد او المعاكسة..
حور وهي تحس بانها غير.: مادري ليش.. ماحب اكون معاكم في كل شي.. احس اني لازم اكون غير..
سرور وهي تلم اختها من ورى:... انتي رائعة مثل ما انتي حور.. جريئة وبريئة وتملكين شي من التغير اللي احنا ما نقدر نتعايشه.. واتمنى منج انج ما تتغيرين..
حور وهي تمسك يد اختها بابتسامة: صدقيني يا سرور.. اذا قلت لج اني جذي مب مرتاحة.. بس بعد احس اني ما قدر اتغير..

الا بدخلة بدور وهي مكفهرة:.. لحقوا امي وايد تعبانة وطاحت بالصالة..

قامت كل من حور وسرور بسرعة وكان الزمن توقف عليهم.. وكانت الجازي نايمة على الأرض وعلي يمـها وبدور ماسكة سماعة التلفون تتصل في 911 خدمة الطوارئ.. ماكان مسموع في آذانهم الا صوت ابوهم وهو يوقف الجازي من اغمائتها..

حور ووهي لامة ماما عابدة بخوف: ماما علامها امي؟؟ ليش طاحت؟
ماما عابدة: كانت واقفة جنبي ومادري ايش الي حصل لها.. سترك يا رحيـم..

وصل الإسعاف وشال الجازي اللي كانت بعدها على اغمائتها وعلي مو عارف شيسوي في البنات الاربع الواقفات على الباب يترقبون امهم اللي طاحت جدام عيونهم.. بانت على ملامحهم معالم الخوف اللي ما تطمن قلبهم.. وبدوا يفهمون او توضح لهم صورة كون امهم مصابة بمرض معين .. بس الحين الباقي اهو كلام الجازي لهم.. والله العالم شنو اللي بتلاقيه الجازي..

----------------------------------

في الشـرق..

بليلة حلوة هادئة ورومانسية الرياح وقفف عبدالله وهو يحس بريحة الليمون تفوح من كل الجوانب.. طال ببصره الى البيت القديم.. المكان المحظور عليهم وين ما بس ابوه اللي يدخل ويتحسس اطراف الزمن القديم.. وين ما قصص اليد ياسين واخته اللي توفت وزوجته اللي هم توفت.. وصغر ناصر ولعبه وولعه..

مشى بخطوات متهادلة تدل على التعب الجسدي.. كان بعده بثياب الفروسية وللحين البوت بريله.. يحس بالوحدة مع الهوا اللي يتسلل في شعره الطويل.. تم يلعب في الرمل بريله ويرسم اشكال ويركل حفنات من الرمل.. ويعترف بينه وبين نفسه ان الليل كريه اذا كان القلب فيه خالي من اللي يحلى سهر الليل به.. لكن عبدالله يحب؟؟؟ فكرة الحب ما تخطر في بال عبدالله لكونه كاره البنات من الاصناف اللي لاقاها ويلاقيها بعايلته وبرع عايلته.. لا تفهمونه غلط.. الاصناف هذي بنات عوايل وترباية سنعة لكن الغباء اللي فيهم وميولهم نحو التغلف بالبريستيج والترف والغنا والتشبه بالعوايل الملكية شي يبعده عنهم.. خصوصا وانهم يتبعون الزوج في تفكيره والريال في تحكمه وتصرفه ويصيرون مثل الخاتم بصبعه.. هو ما يبي جذي.. يبي وحدة شرسة نمرة يتناجر معاها الوقت اللي يكون المناجر حلو فيه.. ويدلعها وتدلعه في الوقت اللي يكون وقت الدلع.. يبي وحدة صغيرة لكن في الدنيا فاهمة وكبيـرة.. إمراة تتنفس الانوثة في جوارحها والكبر في عقلها.. الظاهر انها امراة مستحيلة التواجد.. فما قدر الا انه يتلفظ باشعار نزار قباني بحق المرأة الكاملة والكمال لله..

وغنى بصوته الجميل المليان حنين وشوق كبيـر لأمراة ما تواجدت بالزمن..
.. اشهـد ان امرأة تجتــاحني .. في لحظات العشق كالزلزال..
تحرقني.. تغرقني.. تشعلني تطفئني تكسرني نصفيـــن كالهلال..
تحتل نفسي اطول احتــلال واجمل احتــلال..

وماكان من سيف اللي يبات عنده بالمزرعة الليلة الا انه يتحرش فيه:.. الله اللللللله.. يا ثائرا بشعره وشاعرا في ثورته..
عبدالله وهو منحرش: عنبو ويهك جنك فظولي كل مكان تطلع..
سيف وهو لابس البيجاما الزرقا: مالت عليك عاد.. يحلى لك هالويه.. انزين قول لي.. من هذي.. الا انتي؟؟
عبدالله وهو يناظره بغرور كثافة رموشه:.. مو شغلك..واصلا هاي مو بنت..
سيف وهو فاج عيونه بطنازة: احلف بس.. افا يا عبدالله ما هقيتك من هالنوع..
عبدالله وهو يكمشة من رقبته: انت ما تيوز؟؟ ما تيوز يعني؟؟؟
سيف: هههههههههههههههههه شدراني فيك.. تقول لي مو بنت. .عيل شنو؟؟ نعامة؟؟
عبدالله وهو يقعد على التراب: النعام احسن من هالبنات..
سيف وهو يقعد وياه: وشلي قاهرك في هالبنات.. تراهم كلهم امهاتك ويداتك وخواتك وحريمك وبناتك..
عبدالله وهو يتنهد بمرارة: للأسف.. تعرف سيف.. المرة الوحيدة اللي احترمها بهالدنيا اهي مويز اختي.. صج صج حرمة ولا كل الحريم..
سيف وقلبه يرف باسم موزة الطيبة الحليوة,,: الله يخليها لك..
عبدالله: لا والله seriously موزة اختي صنف ثاني من الحريم.. ابوي مايقدر يصبح الا على ويهها.. وبيتنا مايشوف الشمس الا بصوت القرأن وريحة العود اللي تدخن البيت فيه.. شي في موزة اختي يخلي ابوي مايزوجها ويخليها وياه.. ويخليني انا بعد اتمنى انها ما تتزوج وتظل ويانا على طول.. خسارة بس اهي مو وياي هني.. جان انا خلاص مارد البيت الكبيـر..
سيف وهو حاس بالظيق من كلام ارفيجه العزيز عن اخته..لان موزة تعتبر منال سيف اللي ما يقدرحتى يوصل له بسبب ابوها حارب:.. انت الحين قوم ارقد شكلك وايد تعبان.. والفرس شلختك اليوم وسدحتك ارضا..
عبدالله وهو يناظر البدر بتنهيـدة:.. وينها اللي تعطيني الحب مثل ما ابيه.. ومو مثل ما ابيه.. وينها اللي تخالفني وتماشيني.._(انحنى على سيف) وينها سيف ويــنها.. حرام انا يكون مصيري وحدة خدية من هالخديات اللي في عائلتنا..
سيـف وهو يضحك من انحنائه سيف: ولا يهمك. انا موخدية تزوجني بوافق عليك..
عبدالله وهو ينسدح علىسيف ويخنقه: مالت عليـك يالاربد..

----------------
في البيت الكبيـر كانت موزة قاعدة وهي تذاكر ويا اختها عايشة اللي عندها امتحان باجر.. وتدخل عليهم امهم فاطمة بزهوها واناقتها العالية..

تكلم عايشة من غير ما تناظر موزة:.. يمة عايشة تذاكرين..
عايشة: ايه يمة مويز تذاكر وياي.. عندي باجر مد ترم.. الا بقول لج امي.. المسئولة عن المدرسة عازمتج على حفل تكريم المتبرعين انتي وابوي..
فاطمة وهي واقفة بجلابيتها الانيقة: متى؟
عايشة وهي تحك خشمها برقة: كانه يوم الاربعا..
فاطمة وهي تفكر وتناظر اظافرها الطويلة المرتبة:. مادري والله الظاهر ان عندي اجتماع في مجلس المرأة.. لكن بعد بشوف..
عايشة: اي يمة الله يخليج لاني انا بعد بيكرموني .. (تطالع موزة بفخر) اسرع طابعة على حبات الكيبورد..
موزة وهي مفتخرة قيها: الله الله شعندها.. سكرتيرتي المستقبلية؟
عايشة: وليش مو العكس يا حظي؟؟
فاطمة وهي تستلم بنتها في هاللحظة: وليش موعكس؟؟ ليش ان عايشة ما تمشي يعني؟؟؟

كانت فاطمة تنوي بجرح موزة لكنها جرحت عايشة وفي الصميـم.. فما كان من عايشة الا انها تنكس راسها بزعل كبير وبانت حمرة الصياح على ويهها..

موزة تجول عيونها بين اختها وبين امها:لا والله امي.. انا كنت اتغشمر اسفة يعني.. ما كان قصدي هالشي والله العالم..
فاطمة بكره: الله العالم باللي انتي تقصدينه.. وربج شاهد عليج.. تصبحون على خير..

طلعت فاطمة من الغرفة وهي متوجهة الى دارها.. وموزة شافت دمعات عايشة اللي خرت بكل هدوء عجزها

موزة: فديت هالدموع والله.. لا هانت دموعج يا عويش انا اسفة صدقيني ما كان قصدي جذي..
عايشة: انا ادري اني عبالة بهالبيت.. وادري ان امي قصدت هالشي عشان تظيق خاطرج.. بس هاي حكمة ربج صح مويز؟
موزة وهي تلم اختها: اكيد يا عوووش هاي حكمة ربرب العالمين.. بقول لج شي.. (وهي تمسح دموع عايشة الجميلة) في هالدنيا.. اشياء جميلة تقبح انسان.. واشياء قبيحة تجمل الانسان.. شوفي انتي.. عجزج وشللج شي قبيح يجملج.. وانا ماتخيلج واقففة وتمشين لانج بتكونين غير.. لكن شوفي بنات خالتي ام سيف.. كلهم جميلات وجمالهم هذا يخليهم من اقبح البنات.. بسبب اخلاقهم التافهة وغرورهم الشيطاني.. دايما قولي الحمد لله لاني جذي.. لان نعم رب العالمين تتكون في اغرب الاشكال والعطايا..
عايشة: الحمد لله رب العالميـن.. بس يا موزة.. لا تقولين انج ما تتخيليني اقوم وامشي.. تراني ميتة ابي امشي.. ابي اشوف ظلي.. ابي اشووف طولي يعلني اشوف طول ريلي..ههههههههههه
موزة : ههههههههههههههههههههههههههههههه مالت عليج هاي اللي تحاتينه.. انا اختج العودة وما حاتي الرياييل..
عايشة: ولا انا.. بس انا احاتي واحد..
موزة وهي منصدمة من اختها: ومن يعني يا مسودة العيون؟؟؟
عايشة بحالمية وهي تناظر موزة: اهو هندي لكنه شايل القلب شيل.. شاروخان ما غيره..
موزة: هههههههههههههههههههههههههههه مو زين اتحبين هالأوادم.. تراهم ما يعرفون ربج..
عايشة: ويه شتقولين مسلم هذا خاان.. من ربع حسان خان السايق..
موزة: قطع الله بليــٍسج..
عايشة وهي تعض شفاتها: موزوه.. اتصلي في ناصر.. فديت ويهه وحشني بالحيــــل..
موزة ووهي مكتئبة: من الصبح وانا اتصل فيه وتلفونه مغلق.. مادري شفيه..
عايشة بحزن: هذا متى بيستحي وبيرد الديرة ترى والله تقطع يوفي من شوقي له..
موزة وهي تناظر عايشة بنص عيون: تقطع يوفج؟؟ ماقدر عليج يا العيوووز..
عايشة: وي شهالهرج؟؟؟ ماتدرين هذي حشاشة اليوووف ومصدر العوق وساس الشوووق فديييييييييته ناصر بن حارب بن سالـم..
موزة: حطي حطي بالج في الدرس لا نتفج الحين يالدياية.. عيوز المدقة..

---------------------------

في بيت ام سيـف البنات متيمعات.. واقصد بالبنات كلهم..بنات ام سيف وبنات ام شاهين اللي اهي ام سبيجة.. وتعريف العايلة بيكون كالتالي..
ام سيف اهي اخت فاطمة الكبرى المتزوجة من رجل الاعمال المعروف ابراهيم بن رحيم.. وعندها منه سيـف الكبيـر وسهيـلة المتزوجة من ولد عمها ولطيفة حلم العايلة لعبدالله..
وبنات ام شاهين المتزوجة من اللي كان مقرر منه الزواج بالجازي ولد عمها غانم بن فلاح.. وعيالهم اهم شاهين وعذرا الكبيرة شديدة الغرور وسبيجة ومروان الصغير..

ومع هاليمعة كانو بنات العايلة اللي ياين من صوب ابو موزة حارب متيمعات بعد.. وهذول البنات يعتبرون كلهم شبكة من النميمة والكراهية والنفاق ما بين بعضهم.. تجمعهم وتفرقهم نفس الامور التافهة.. زواج عذرا المقرر من ناصر وزواج عبدالله المقرر من لطيـفة..

لطيفة وهي ترفع كاس الشاي بيدها: اقول سبوج.. سمعت انج رسبتي في امتحان اللغة؟؟؟
سبيجة وهي متلعثمة وامها تطالعها: سبوج يا ويلج ان رسبتي بيطردونج هالسنة!!
سبيجة وهي مستغربة من اي مصدر سمعت لطفوه هالكلام: من قالج انتي؟؟ فال الله ولا فالكم.. انا اصلا ماقدمت في شي عشان ارسب..
لطيفة وهي تناظر عذرا بغرور: عذرا اهي اللي خبرتني..
عذرا بصوتها الاجش الغاوي: ترى مويز اللي علمتني
سبيجة :جذوب من عينج.. مويز بنت خالتي فاطمة ما تعلم ولا تقول..
عذرا بخبث: يعني هالكلام صح..
سبيجة وهي منقهرة من اختها الحية: وانتي بقول لج.. خلصت عقرتج ونميمتج عشان تستلميني.. تراني مو قاعدتن لج عشان تتبرزين فيني؟؟
عذرا: قطع محد يكلمج انتي تزلطينه..
سبيجة: لا تتدخلين عويذر تراج انتي الندمانة عيوني..
عذرا: ارجووووج.. (وهي تمد يدها المتروسة جواهر وبأظافرها المانيكيرية) ما ايي منج انتي ولا من اللي مثلج خير..

سكتت سبيجة ووياها عذرا ولطيفة تناظر سبيجة بخبث لمن انتبهت لها ووطت عيونها.. وحست سبيجة انها لازم تنتقم من هالحيتين في اقرب بوقت ممكن..

الا واشراق بنت عم سبيجة صاحبة القلب البسيط تتكلم لسبيجة: سبيجة الا شخبارها موزة.. زمان ما شفناها بميلسكم..
سبيجة تكلم اشراق من غير نفس لانها وايد مسيجينه وعلى نياتها وتبط الجبد بمثالياتها: غرقانة في العناية باختها وبعبدالله وابوها وحتى امتحاناتها..
ام سيف من سمعت اسم عبدالله استلمته في الميلس: والله هالصبي اللي انا اشتاقت عيوني له.. من زمان خبري عنه.. سواف متنقع وياه وانا ولا ادري عنه ما جني خالتي ايي وايزورني..
لطيـفة حست بالكدر وعذرا تكلمت لها بالهدوء: لا تبينيين انج زعلانة خلج قوية.. انتي مو شاريته اهو اللي شاريج (تعلي من صوتها) تراهم كلهم من نفس الطينة عيال عمي حارب.. مادري شمنه مخلوقين.. واحد متغرب ومتبري من هله.. والثاني دابج عمره في الحظاير ووالزرايب.. الله يعين سيف وشاهين عليه..
ام شاهين: والله شاهين يا في شقله يا في سفراته ويا في البيت.. احياااان اللي اهي يقظيها ويا عبدالله
ام سيف: لا والله انا موزعلانة على ولدي ليش انه وياولد خالته بالعكس له ونيس وارفيج وحبيب..
لطيـفة: الله يسلمهم كلهم من الشر.. تعالي سبوج ما تدرين عن ناصر شي؟؟
سبيجة وهي تناظر القهوة التركية اللي فيديها بحواجب مرفوع واطلقت الاشاعة اللي بتسم جبد عذرا شوي:.. مادري بس سمعت انه ملج على اميركية
عذرا وهي تنقز مثل الحيا: قص بلسانج.. لا تجذبين
سبيحة بابتسامة الانتصار: ويه شفيج نقزتي جنج اعوذ بالله حيه.. هاي مو كلامي.. هاي كلام الاخبار..
عذرا: واي اخبار هذي؟؟
سبيجة وهي تقوم من مكانها: اخبار الساعة ثمان.. هاهاهاهاي.. باااااااااي..

طلعت عنهم سبيجة وهي لايعة جبدها من هالحريم.. وعلى طول راحت مكتب ابوها وين ما يقعد ويطالع الاخبار او ويتقرى الجرايد.. ودخلت عليه..

سبيجة تحب ابوها ليش انه عايش في ذاته وفي دنيا الادب اللي يحبها وخيالات الحب اللي تتملكه.. احيانا تغبط امها على ريال مثل ابوها لانها ما تقدره التقدير المناسب له.. وتحس ان ابوها له من الحب الحق الكامل لقلبه الطيب.. حب اخت عمها حارب الجازي وتمناها لكنها اختفت من الدنيا وكانها فص ملح ذايب..

دخلت عليه المكتب وما لقته موجود.. وراحت عند طاولته لقته فاتح كتاب باسم (بيت) لغازي القصيبي.. وتمت تقرى في البيت اللي وقف عليه الكتاب ورفعت راسها..

سبيجة: ربي ارزقني اللي مثل ابوي.. يشيلني بمحبته ويحطني تاج على راسه وهو بالمثل..

...............................

--------------------------------------------------------------------------------

--------------------------
ظلت موزة في دارها وهي تتنسم من الهوا البارد اللي يعم هذاك المساء اللذيذ.. اشياء كثيرة على بالها.. منها كايد.. ومنها الماضي ومنها عبدالله ومنها ما هو مفقود..

حست بالضياع.. ومرة وحدة بين ابوها جدام عيونها في حديقة البيت قاعد وهو مليان بالتفكيـر وادقت النظر فيه لمن حست بانها متواصله وياه في باله...

وانتاب بالها هاللسان اللي نطق من ثمها بصوت مسموع..:.. كل القصور المشيدة.. اللي تجمع الاوادم فيها.. تشتتهم.. تبني على كل واحد منهم جدران من الكنكريت اللي يغلف معاه المشاعر اللي فيوم حسو بها... وينك يا ناصر... في اي نجمة واي مجرة ظايع.. ووينج يا عمتي.. اللي بغيابج هالكون الوسيع ظيق على ابوي.. ووينك يا عبدالله.. ياللي بغيابك وحاجتك تبعدك عنا يوم بيوم... متى ياربي بيي اليوم الليي ايمع الكل في خلية وحدة.. خلية تبعد الكل عن الحقد والكره والضغينة..

وسمعت صوت الباب ينفتح وعرفت على طول انها عايشة... والتفتت لها ولقتها واقفة على الباب...

موزة: خير عايشة؟؟ علامج؟؟
عايشة وهي تناظر موزة: مويـز..بسألج سؤال..
موزة وهي تروح عند اختها وتدفع كرسيها الى صوب الكرسي:.. شنو سؤالج؟ظ؟
عايشة وهي تناظر موزة بغرابه:.. احنا ليش جذي موزة؟؟؟
موزة: شلون جذي؟

عايشة: جذي.. يعني.. ابونا ما يحب امنا.. وامنا ما تهتم فينا كفاية.. واخواننا ما يبون يقعدون ويانا؟؟ شفينا يعني؟؟
موزة وهي تبتسم لتخفف من كلام اختها الحزين: الحمد لله يا عايشة احنا احسن من ناس وايد..
عايشة وهي مو مصدقة: ماصدقج يا موزة.. احنا شلون احسن من الناس؟؟ بالفلوس يعني؟؟؟ ماشوف هالفلوس تنفع في انها ترسم ابتسامة لابوي.. ولا رضا في ويه امي.. ولا قربب من اخواني ولا فيج انتي بعد..
موزة وهي مستغربرة: انا؟؟ علامي انا يا عايشة؟؟ الحمد لله عايشة ونايمة وقاعدة وماكلة وشاربة..
عايشة: وقلبج يا موزة؟؟ لمتى بيتحمل..

عرفت موزة عايشة شتقصد.. اهي الانسانة الوحيدة اللي تدري بقصة عشق موزة الطفولي الى شاهين واللي تركها في يوم من الايام بغربة واعتزال الا ان مات هالحب في قلبها..

موزة وهي تناظر عايشة بصلابة وابتسام:.. عايشة انا قلبي نسى الاحزان من زمان.. دفنها واستمر بالحيا بقرب اهلي الاولى بمحبتي..
عايشة: موزة.. لو تدرين ان شاهين يبيج للحين شيكون ردج؟
موزة بصلابة: بيكون لاء يا عايشة.. انا ما بقدر احب شاهين مرة ثانية الحب اللي حبيته اياه في يوم.. ولا تنسين بعد انا كنت مراهقة.. وكانت اول ايام غياب كايد عني اللي ارهقني وخلاني اتعلق بكل من عشان بس احس لوجوده في حياتي..
عايشة وهي تعصر نفسها بقوة: والله لو الاقيه هالنويصر اادبه.. حرام عليه هالشوق اللي ذابحنا فيه..
موزة: ههههههههههههههههههههههههههههه هدي اعصابج يا عمري ترى والله ما يسوى عليـج..
عايشة: تدرين.. والله خاطري يرد.. اطقه طق.. والمه وابوسه واخليه ياخذني المزرعة واقعد في البيت العود.. هناك وين ما طيف عمتي الجازي يسكن وطيف ابوي بعد...
موزة وهي معصورة القلب: الله عليج يا عايشة.. ابوي صار طيف الحين؟؟ظ
عايشة وهي تعض على شفاتها لانها آلمت موزة وحست هالشي من صوتها: مويز مو قصدي والله.. بس...... ابوي ما عاد..... ابوي....

سكتت موزة وراحت عند الدريشة تطل على ابوها ولقته بعده في مكانه... وذرفت دمعتها الحزينة

موزة: ياربي.. يا ربي اطلب منك وانا ما امل من الطلب منك لانك المستجيب.. ياربي لا تذوقني هم ابوي اكثر.. ورد لي اخوي من محل ما غايب فيه.. رده لنا يا ربي ورد لنا الدم اللي يجري بالعروق.. ترى والله دنيانا ما تسوى من شقى هالجروح شي..

----------------------------

يومين والكوفي شوب شغال بالتناوب بين البنات.. حور مشغولة مابينه ومابين لوحتها ومابين المستشفى وين ما امها ترقد من ايام.. للحين محد خبررهم عن مرضها ومن المفروض ان الليلة يخبرهم علي بالتفاصيل لانه خلاص قرر يخبرهم ويخبرر الجازي بقراره في الرجوع الى ديارهم..

وكانت الساعة عشر بالليل يوم كانت حور ويا سرور يشتغلون في المطعم لاخر ساعة من الدوام المتواصل.. وكل وحدة منهم تشتغل بصمت ولمن احد يسالهم عن امهم وابوهم يقولون انهم مشغولين في البيت..

سرور مافقدت مرحها في التعامل مع الزبائن الا ان حور ثقلها مخليها اشبه بالروبوت اللي يتحرك وفق اوامر معينه.. كايد ومحمد كانو يتمشون صوب الكوفي شوب وهالمرة محمد اللي طلب من كايد انهم يدخلون.. لكن كايد مانع هالشي بسبب الصورة اللي شافها بهذيج الليلة والاحساس العميق اللي تركته فيه من الذكرى والحنين ..

محمد وهو متحمس ويتحرك بجاكيته الاسود الطويل الانيق: والله ياكايد.. مادري شلون .. بس وايد ارتاااااااااااااح لمن ادخل هناك.. فيهم شي اللي يشتغلون.. يخليك تتقرب منهم..
كايد وهو يفكر في حور ويسكر عيونه عشان تغيب عن باله..: انت ادخل اذا تبي.. انا مابي.. برجع الشقة .. ثاندر بروحه من متى..
محمد وهو يوقف في درببه: عليهم الحرام ان رحت.. انت كل مكان تبي تروحه انا اروح معاك وانت ما تبي تدخل هناك.. من يدري..يمكن تلاقيها..
كايد وهو يصنع الجهل: الاقي منو؟
محمد وهو يبتسم بحلاوة:.. اهي... اللي في الساب واي..
كايد وهو مطفر من النار اللي تهيج فيه كل ما يذكر حور: اي ساب واي.. شفيك انت مو صاحي؟؟
محمد : علينا.. انا مو صاحي؟؟ اذا انا موصاحي انت شنو؟؟ تعالي يا حبيبتي ووخلينا نروووح..
كايد وهو يبتسم: thanks but I'll pass
محمد بابتسامة الاغراء: sure
كايد: ايه شوور.. يالله تصبح على خير..
محمد: فايــن.. تصبح على خير..

مشى محمد بعيد عن كايد صوب الكافيه الا يلتفت له ويصرخ عليه : you'll miss the sweet coffee with pancake

مشى محمد عن كايد اللي ظل واقف مكانه وهو يناظر الكافيه مثل لعبة الاغراء.. وظل واقف وهو يطل على نهر الهدسن وبعيونه الشوق الى شوفه حور مرة ثانية.. تذكر السلسلة اللي اخذها هذاك اليوم طلعها من جيبه الكشميري وتدلت جدام عيونه بحرف الH

كايد وهو يرد يناظر الكافية: الله يلعن عدوك يا محمد...

وراح وراه الى داخل الكافيـه..دخل ودور بعيونه وما لقاها..لان حور استأذنت وظلت مكانها بدور اختها اللي تخدم دقيقة وترفع نظارتها دقيقة ثانية.. كايد بعده ما عرف بغياب حوور وشاف محمد اللي كانت عيونه على سرور المليانة بالابتسام والضحك..

كايد وهو يقعد يم محمد: مالت عليك..
محمد: شفيك ييت.. (يغمز له) ماقدرت تقاوم..
كايد: اسكت لو سمحت وسرع يالله..
محمد: شفيك.. لايكون البيبي ستر وانا مادري.
كايد: اسكت لافظحك الحين يور هاينس..
محمد: تفضحني.. اوكي.. اسمع هالشي.. (شرب من الهوت جوكليت) البنت.. اللي في السابواي.. طلعت من دقايق..
كايد وهو مصدوم:.. جذاب..
محمد: واللــــــــه.. وحلت مكانها هالبنوتة الصغيرونة..
ناظرها كايد وشاف الجمال الإلهي فيها.. لكن هالشي ما أُثر عليه..: يلعن ايامك يا بليس...

قام كايد عشان يطلع من المكان... ومحمد يصوت عليه

محمد: وين رايح؟
كايد: بروح بعد مالي قعدة هني..
محمد:اشرب هوت جوكليت.. بيعجبك..
كايد وهو يطلع:/ خله لك اشوفك باجر..

طللع كايد وهو يحس بالقهر يعم فيه.. واول مرة يحس بهالشي.. شكثر كان متطلع انه يشوف حور وقبل دقايق من دخلته طلعت.. يكره هالشوق اللي فيه ويكره هالتمني بشوفتها ويكره هالخيبة الامل اللي فيه.. عمره ماحب وعمره ما شعر باحساس الحب.. ويحسه شي غبي وغريب يمر فيه ولازم يدفنه باسرع وقت واسرع طريقة..

سرور اللي انتبهت الى وجود كايد لاحظت بعد غيابه والتفتت الى زبونها المفضل حاليا

سرور: وينه ارفيجك؟؟؟
محمد وهو مستغرب: من؟؟ كايد؟؟
سرور: عاد مادري شسمه الللي دايما وياك.. ساكت وما يتكلم..
محمد: اي هذا هو كايد.. اهو الوحيد ترى.. مادري وين راح.. متظايق من جم يوم..
سرور: يحب؟
محمد يبتسم: بدايات..
سرور وهي تتنهد: الله يعينه عيل..
محمد وهو محتار: تعرفين للشعور؟؟
سرور: الحمد لله لاء.. بس اشوفه في عيون الناس.. صدقني.. اصعب شي واكره شي في هالدنيا من بعد الاكل الخالي الدسم اهوو الحب..
محمد: I Don't know about that الحب كل شي في هالدنيا..
سرور: لا تفهمني غلط.. ألحب شي رائع لكن.. في عيون اللي يتبادلونه..
محمد وهو يناظرها بابتسام: وانتي شرايج فيني ؟؟اصلح احب..
سرور وهي مستغربة ومنحرجة شوي:... م.. مادري.. يمكن..
محمد وهو مستغرب: ممكن؟؟ come on احتاج الى اجابة اقوى.. طالعيني زين وشوفيني.. اقدر احب
سرور وهي تضحك: يمكن.. من يدري.. (طولت النظر فيه) عندي احساس.. انك اذا حبيت.. بتنحب.. قول ليش؟
محمد وهو مبتسم بعراضة:.. ليش؟؟؟
سرور: لانك تاكل نفيـش..(Popcorn)

محمد وهو مستغرب وسرور تضحك عليـــه..

------------------------------

ترخصت الجازي وردت بيتها وبناتها مافتحوا المطعم كرما لوجودها في البيت.. وظلوا معاها طول اليوم يخبزون ويطبخون لها
علي ما خببرهم بشي والحزن ماكل جبده وفاطر قلبه.. يخبي كل شي عن عيونهم وعن الجازي بالأهم.. يخاف يخبرهم عن اللي يصير وتتحطم حياتهم في دقيقة مثل ما حياته متحطمه من بعد ما كانت الدعامة الكبرى..

ويوم اختلى مع زوجته في غرفتهم.. ابتدى في طرح فكرته اللي تجول في باله من فترة...

علي:... الجازي.. لو اخبرج... انج بتشوفين اخوج... شبيكون ردج؟؟؟
فجت الجازي عيونها على وسعها تحت ضوء الشمس الساطع وين ما كان زوجها واقف:.. شلووون؟؟؟
علي وهو يناظرها ووجهه مسود من الحزن:.. نرجع يالجازي.. نرجع من محل ما يينا.. ومعانا بناتنا...
الجازي باستغراب: انت شتقول؟؟؟ وين نرجع؟؟ وحياتنا..
علي وهو يتحرك بسرعة في المكان: حياتنا هناك يا الجازي.. حياتج وحياتي وحياة البنات وحياة اللي هناك مع بعضنا البعض....

ظلت الجازي ساكتة وهي تناظر زوجها بحيرة واستغراب..وعلي متوتر ومتنافض ومو عارف شلون يطلع الكلام منه...

الجازي: علي.. البنات مو مستعدين
علي: بلى.. البنات مستعدين يا الجازي.. تراهم مو الصغار اللي ربيتيهم.. احنا اصغر بناتنا عمرها 11 سنة.. واكببرهم في سن ال24.. كلهم حريم ما شاء الله عليهم.. they can take it يقدرون يتحملون يا حياتي..
الجازي وهي توقف بوهن:بس يا علي هذا موضوع جبير.. اني اخبرهم عن ماضينا هذا شي بسيط لكن... سبب روحتنا ورجعتنا.. بيستغربونها..
علي: لاننا بنخبرهم بمرضج يا الجازي.. بنخبرهم اننا ما نقدرن نعيش هني وحنا نعاني..
الجازي وهي تبتعد عن علي برعب: لا.. ما تقول لهم يا علي.. ماتقول لهم..
علي وهو يعصب ويثور في الغرفة: مليـت يالجازي وانا حامل هالألم اللي يعصر روحي عصاااار بروحي... رحميني يا الغالية رحميني رحمج الله في دنياج.. .. (سكت علي وهو يحط يده على حلجه ويتنفس بقوة والجازي تناظره برعب)... ماقدر .. ماقدر اشوفج تموتين يالجازي وانا ادري ان صحتج وهناج مع اهلج... لمتى بتتحملين فراقهم.... 25 سنة او اكثر وانتي بعيدة عنهم.. انا انسان يالجازي ماني حجر اللي اقسى عليج...
الجازي: انا مرتتااحة معا
قطعها: مرتاحة ما قلت لج مو مرتاحة.. لكن انا مو مرتاح لكونج مريضة في الغربة.. ابي اردج يالجازي..ابي اردج لحارب واردج لديارج ولمزرعتج ولهلج
الجازي وهي تحضن زوجها: انتي هلي وانت ناسي..
سكت علي شوي.. ومد يده يمسح راس زوجته المسكينة:... وانتي طوايفي يا الجازي.. بس لازم ترجعين.. (رفع راسها) لازم ترجعين يالجازي... ترجعين لحارب ولعياله..يحتاجونج وانتي تحتاجينهم..

سكتت الجازي... وبحيرتها ظلت قاعدة مكانها... تناظر في ويه زوجها العاقد قراره وتفكر في بناتها اللي بانتظارهم احزان وهموم كبيـرة يمكن اهم ما تربوا عشان يتحملونها...

ياترى.. بنات علي شنو ينتظرهم..
والجازي.. بتوافق على الرجوع؟؟
وبغيابهم عن الساحة.. كايد ومحمد وحياة.. شنو اللي بيلاقونه في مصيرهم
قلب محمد.. توجه الىسرور؟؟ والا اهي مجرد صديقة تبعث السرور في نفسه..
كايد.. حرارةالحب هذي صادقة والا مجرد حاجة من حاجاتك المتعددة الغير ملبية..
حياةة., بيتحقق حلمج والا شنو؟
عبدالله... هل من الممكن الحب اييك في نسايم ليل مزرعتك الباردة...
موزة وعايشة.. بتحقق امنيتكم؟؟ والا انتووا يايكم المزيد من الشوق والانتظار...

مذكــرات الأم.. ما دروها.. وما فاعليتها..

كل هذا في الاجزاءالقادمة...

ولكم مني جزيل الشكر..
حمران النواظر..
------------------
نهاية الجزء الثاني

ما شاء الله على حبهم علي والجازي

انتظر التكمله

الجزء الثالــث-

-------------------
الفصـل الأول
.. إعلان الرحيـل ..

حور ترسم في لوحتها والنهايات مشرفـة.. والنتايج مقبولة وممدوحة.. حتى من طرفها مع ان قلبها ينزف من الألم اللي ما تحاول حتى انها تخفيه.. مع كل تطور وكل مرحلة تعبرها اللوحة تذرف حور الدمع الساخن على مشاعر جميلة نمت في قلبها..

يات لها سرور وهي ترسم ووقفت وراها وهي حاملة كوب كوفي لحور المنهكة في الرسم: حلوة الظلال الي رسمتيها (وتأشر ورى الويه) شي يبين البرود .. مثل عيونها..
حور وهي تبتسم للي بالرسمة:.. مادري بس يوم عن يوم يزيد تعلققي بهالبنت.. احس انها... المختارة..
سرور وهي تشد خد اختها: اهي المختارة لفارس احلامها.. وانتي بعد لج فارس ا حلامج
قامت حور من مكانها وكانها منلسعة من شي حار: مابي فارس احلام ولا من هالخرابيط.. انا مثل ما انا مرتاحة..

سرور وهي تبتسم على كلام اختها.. وايي على بالها محمد بسرعة.. وتضحك مابينها وبين نفسها.. وحور انتبهت لها وناظرتها باستغراب..

حور: شي يظحكج؟
سرور وهي تقعد وشي من الحمرة اللي اهي مو واعية عليها تصبغ خدودها: هناك هالشخص حور...
حور وهي تفج عيونها في ويه اختها: اي شخص؟؟؟
سرور وطبيعتها المليانة تبينها في منتهى الجمال والحبور:.. شخص.. ايي الكافيه.. واظنج شفتيه لان صارت له امرار ايي وانتي هناك..
حور وهي تقعد ومظهرها يوحي بالاهتمام: اي واحد وشلون شكـله..
سرور وهي متحمسة: هذاك اللي ويه ابيض وشعره اسود ومافيه الا هالسكسووكة الفاتحة.. اللي دايما يلبس ثياب انيقة..
حور وهي تحك شعرها الحريري عاد انها ترجع الذكريات: ماذكره بعد بعد وصفيه اكثر..
سرور: تذكرين ذيج المرة يوم اتيين الكافيه وياج بدور ويلستوا اتهاوشون جدام الناس وانتي تصادمتي ويا اللي كان قاعد..
حور على طول يا على بالها كايد ويوم شافته في الساب واي: اللي في السابواي؟
سرور وهي مستغربة: اي سابواي؟؟
حور وهي تذكر كايد زين وتذكر ويهه الطفولي:.. هذاك.. اللي ضربته في الكافيه...
سرور: اي في الكافيه شياب السابواي الحين؟

استرجعت حور ذكريات هذاك اليوم الكريه اللي ما كانت حاسة فيه لنفسها.. ولا اراديا امتدت يدها الى رقبتها كحركة اعتياديه تسحب فيها سلسلتها لكنها ما شافت شي.. وتمت تتلمس وما تحس بشي

حور وهي تتكلم وكانها تسترجع اللي صار: كنت امشي طالعة من الترين.. وضربت فيه. طحت على الارض و.... (فجت عيونها في ويه سرور) وباق سلسلتي..
سرور وهي منصدمة: سلسلتج
نقزت حور من مكانها: اي الحرامي.. باقي سلسلتي.. اللي عطتني اياها امي في عيد ميلادي السنة اللي طافت... الحرامي .. الميهود الحرامي ولد الفقر.. باق سلسلتي..
سرور توقف لاختها: هدي بالج انتي وخبريني شلون باقها؟؟
حور وهي منفزعة مكانها: كانت على رقبتي.. وسحبها اكيد الحرامي..
سرور: الله عاد الحين بيسحبها من رقبتج وانتي ما بتحسين
حور وهي تحك راسها بعيز: I didn't feel it سرورو.. كنت مصدومة.. وi was in shock الحرامي الاستغلالي.. ياويله بس ان شفته مرى ثانية
سرور: لا تظلمين الريال تراه ولد حلال
حور وهي معصبة: بس لانه يعجبج خلاصصص صار ولد حلال..
سرور: اي يعجبني؟؟ مو اهو اللي في بالي.. هذاك ارفيجه وترى اثنينهم وايد ناس كبارية ولهم اسمهم في منهاتن..
حور وهي مطنقرة من الزين: والله لا شفته اقطع هالويه اليامد.. الحرامي..

بدور وهي تدخل عليهم الغرفة وبيدها رمان: اشفيكم تصارخون؟
حور وسرور في نفس الوقت: باق الحرامي سلسلتي/باق الحرامي سلسلتها؟
بدور وهي تعوي ثمها المليان بحب الرمان: اي حرامي؟؟؟
حور وهي ترمي روحها على السرير وسرور تتكلم واهي تاكل من الصحن: الحرامي اللي في الساب واي
بدور وهي تعص على نظارتها المتدلية: اي ساب واي؟؟ اهااا.. ما عليه خليه يولي وعساه ما يتوفج بها
سرور: انا احسها مظيعتها في مكان وتاهمة الريال المسكين..
حور وهي معصبة: اي اكيد بتدافعين عنه ليش انه ارفيجج؟
سرور وهي منصدمة: ارفيجي؟؟ اي ارفيــج؟؟؟
حور: كان هذاك اللي ايي الكافيه.. الساكت اللي مادري شلون يناظر المكان جنه اول مرة يجوف مطعم..
بدور وهي مستغربة وتكلم سرور: what is she talking about
سرور وهي متحيرة: I don't know حور حبيبتي.. شفيج محمومة ولا شي؟
حور وهي تتنرفز وتحط شعرها ورى اذنها : لا لا .. تذكرين الريال اللي ضربت فيه بالكافيه يوم اتناجر ويا بدورو على الجاكيت
بدور وهي تتذكر الجاكيت: اي صج ذكرتيني.. رديتيه ولا شنو؟
حور: اوووووووووه مو وقتج..

سرور: اي واحد فيهم عاد حور الانيق ولا الثاني؟
بدور وهي في موجها الخاص: اكيد ما رديتيه.. وانا شنو المفروض البس ان شاء الله
سرور وهي على وشك التنرفز: بدور حبيبتي مو وقتج..
حور: كان الثاني.. اللي يلبس طاقية على راسه.. اممممف هذاك اللي دايما ايناظر المكان..
بدور وهي بعدها بسالفتها: اذا ما رديتوا الحين مادري متى بتردونه next Christmas
حور وسرور في نفس الوقت: مب الحين بدوووور
فجت عيونها المسيجينة ومدت الحلج بزعل:... فاين.. فايـن.. لا تييني انتي تبين الحسابات.. وانتي (تأشر على حور ومب عارفة شتهددها فيه) احسن لج ترجعين الجاكيت واتييبين غيره لا علم عليج ابوي.... اوكيه؟؟؟

طلعت من الغرفة وهي رافعة خشمها علامة انتصار بتهديدات اهي ادرى انها مو قدها لانها بكل بساطة.. ما تقدر تجازف بهم..

حور وهي تهدد سرور: ان شفته في المطعم يا ويله..
سرور: صلي على النبي يا حور يمكن ظالمة الريال.. أن بعض الظن أثم..
حور وهي توقف مكانها بعصبية: ما ارتحت له من اول مرة شفته.. شاي اجرامي في عيونه I can tell اكيد ناوي على المطعم يبوقه كله ويلطه..
سرور وهي تضحك: شنو يلطه من صجج انتي..؟؟ تعوذي من بليس وانا اقول انج تدورين السلسلة في غرفتج ولا اي مكان ثاني واكيد بتلاقينها..

قامت سرور من مكانها وهي طالعة من الغرفة وتذكرت حور اللي يات سرور تكلمها عنه

حور: سرور ما قلتيلي اللي كنتي تبين تقولينه..
سرور وهي تحس بسخف اللي كان في بالها:..Never mind it was nothing see you at the diner
حور وهي متلومة على تجاهلها سالفة اختها وانغماسها كالعادة بمشــاكلها:.. اوكي..

ثواني بس اللي قظتها حور في التفكير باللي يمكن كانت بتقوله سرور.. وسرعان ما تبخر هالشي ورجع في بالها ويه كايد "الاجرامي" على قولتها..

حور وهي تصر على ظروسها:.. والله ان شفتك مرة ثانية ماكو حور ان ما طلعت عيونك من محاجرها..
-------------------------------
الخالـة رحيـمة.. شخصية يديدة تطل عليكم.. الا انها عريقة وقديمة من قدم الاجيال اللي تتناولها قصتنا.. الخالة رحيـمة حرمة جبيرة ولها من العايلة والاحفاد والاولاد اللي يسدون ويكفون.. الا انها عمرها ما نست شي واحد.. عيال سالم بن علي.. الا وهم حارب والجازي.. اللي ربتهم بحنان الامومة اللي فقدوه في سن صغير..

اسمها ام صقر.. الا ان الكل يناديها بالخالة رحيـمة..

ومثل ما صادقت الجيل القديم من عايلة حارب صادقت الجيل الاصغر وبالذات موزة وعايشة وعبدالله.. ولكن ظلت في قلبها الحسـرة على الجازي وزوجها وعيالها.. وتمنت لو انها تشوفهم قبل ما تجف عينها من الشوف..

85 سنة كان عمرها.. وصفحات ويهها مجعدة من قدم الزمان والذكريات.. بعيونها بريـق العراقة والاصالة.. وعلى جبينها نور الايمان والتدين اللي كانت تتحلى فيه.. كانت تختم القرآن في ثلاث ليالي.. وتختم الصغار القران في اسبـوع.. بعد ما راحت الجازي وراح حارب المدينة.. ظلت في ديرة المزرعة ترعى البيت من فترة لفترة اهي وبناتها.. الى ان تعبت وظلت جليسة بيتها.. لكنها ما بخلت عليهم بالزيارات ولاهم عليها بعد..

---------------

بنفس اللحظة.. نادى علي بناته الاربع اللى الصالة مع ماما عابدة.. والجازي كانت قاعدة وبحظنها بوكس كارتوني بلون الصدف.. ملزقة عليه رسومات البنات اللي يسوونها بالمدرسة ويهدونها اياه من بعد ما يردون.. وكلها تتكلم عن اتحاد عايلتهم الصغيرة الجميلة.. الي ما كانو يدرون انها كانت من الممكن انها ما تنوجد لولا صدق المشاعر والحب الجميل..

حور قعدت يم امها من بعد ما باست راسها وظلت يد امها بحجرها وسرور تكلمت: يبا شي صاير في المطعم؟؟؟
علي وهو واقف والجدية مرتسمة على ملامحها بصلابه: ما صاير شي يبا.. يلسي انتي ويا خواتج.. انا وامكم اليوم نبيكم في موضوع يمكن يهمكم ويمكن انتو كنتوا تتسائلون عنه بس بسبب الجو اللي احنا وفرناه لكم هني ولله الحمد ما خليناكم تحتاجون فيوم للرجوع مرة ثانية اليه..
بدور استغربت ولكن كالعادة ظلت على هدوئها ونور سألتها: شقصده بابا؟
بدور وهي تناظر اختها بخبث: الحين بيقول لج ابوي انج مو بنتنا والعيوز يابتج لعند باب بيتنا في ليلة العيد..
نور ووهي معصبة: كريهة ام اربع عيون

حولت عيونها بدور في ويه نور ونرفزتها وقامت من مكانها وراحت لعند سرور

حور: شالسالفة يبا.. خبرونا.. كليتو قلبنا..

علي وهو يناظر زوجته ينتظرها اهي تتكلم.. والجازي كانت رافضة هالموضوع تماما لان الصورة المرسومة في بالها من بعد معرفة البنات عن هالموضوع مشوشة ومالها وضوح.. فخافت بشدة لمن حست بدفى يعم يدينها الباردتين.. وكانت يدين علي.. المبتسم..

علي: لا تحاتين.. انا وياج..

والعيون كلها تراقبها مدت الجازي الصندوق الى طاولة الكوفي الصغيرة..:.. في هالصندوق.. مذكرات... كنت اكتبها وانا صغيرة... وظليت اكتبها ... (تناظر بدور اللي كانت مجابلتها بابتسام) لدخلة بدور المدرسة الخاصة... لان ما كان يصير عندي ووقت وكنت مشغولة فيكم وفي المطعم ويا ابوكم.. والاحداث اللي انا يمكن ما خطيـتها.. انتو كلكم تعرفونها لانكم كبرتوا ومخكم كبرر معاكم.. واظنكم بتقدرون تربطون الاحداث ببعضها..
سرور والغرابة تتملكها: يمة شفيها هالمذكرات..
الجازي وهي تتنفس الصعداء وتشم في بالها ريحة المزرعة وصوت الخلخال اللي كانت تلبسه وريحة البخور وثوب يدها ياسين المعطـر وصورة ابوها القديمة المعلقة في المكتـب..: هذي مذكرات.. ام لبناتها... ابيكم تاخذونهه وتقرونهه يا بناتي.. وتحاولون على الاقل انكم تتفهمونهه.. لان من بعدها ينتظركم شي انتو بتكونون يا مستعدين.. يا غير مستعدين عشانه
حور تملكها الخوف من كلام امها وانحنت عليها: يمة علامج؟؟ فيج شي..
الجازي ودمعتها تخونها وتذرف من زاويتها وهي مايلة براسها الى بنتها:.. يمة ماكو شي... لا تحاتين.. انتي بس اقري ويا خواتج.. واذا خلصتوا قراية... ردو لي.. وانا اعلـمكم بكل شي..

قامت الجازي من مكانها وعلي ماسك يدها.. طلعوا من المكان ومن البيت كله من بعد ما لبسوا جاكيتاتهم.. وظلوا يمشون على الارصفة الى ابعد مكان من غير حواس.. وهم مو قادرين يحسون الا بالحب العظيم لبعض.. وبالهدوء والراحة النفسية .. ويمكن الخشية على بناتهم الا انهم كانو واثقين من راي البنات.. لانه مهما كان.. اهم راح يدعمونه...

حوور من بعد لحظات الصمت الطويلة ما قدرت تتحمل: بفتح البوكس وبشوف شفيه؟؟
سرور مسكت يدها : انتظري بس.... شقصدها امي باللي قالته
بدور وهي تتكلم بسذاجة سنها الصغير:... خلينا نقرى.. عشان نعرف..

فتحت سرور العلبة الكبيـرة.. وشافت فيها اكثر من دفتر بانوع مختلفة.. وكلها كانت كبيـرة وثقيلة.. بالذكريات الحلوة و ريحة الورق القديم.. وكانت السنين معلمة على الدفاتر.. اقدم دفتر كان في سنة 1975 يوم ما كانت الجازي بعمر الزهور.. عشرين سنة وما اكثر.. واستلمت سرور هالدفتـر وتمت تقراه.. وصارت اهي الراوي على راس خواتها.. وهم المستمعات...

حكت سرور بصوتها الحنون:... 18 سنة من عمري.. مضت.. والله العالم السنين الباقية مني.. لكني اعرف والله العارف.. انها راح تكون من احلى ما يكون.. خصوصا وان اخوي حارب.. راجع للديرة في وقت اقصر من لمح البصر...

ظلينا هالجم يوم نرتب المكان والمزرعة ويدي ياسين كل شوي يروح المحطة يشوف ان جان رجع حارب ولا بعده.. وكل مرة اسأله يقول لي الطيور بعدها ما وصلت بارزاقها.. انتظري الليمون ينضج يا الجازي عشان يرجع اخوج.. وخلي ريحته علامة لرجعته...

طول سنين عمري يا اوراقي وانا اشوف الدنيا من ثلاث ازواج من العيون... يدي ياسين... حكمتي وازري بهالدنيا.. اخوي حارب.. سلاحي وحمايتي.. والخالة رحيـمة..

-----------------------------------

في المزرعة كانت موزة يالسة ويا رحيمة اللي كانت تناظر البيت القديم كل شوي وبعيونها نظرة الشوق للجازي.. وكانها تسمعها تمشي في الدروب والدهاليز.. تسمع صوت قلمها اللي يخط المذكرات ولا ريحة شعرها اللي كل يوم لازم تبخره..

موزة وهي تمسك يد الخالة الحنون:.. خالة علامج سرحانة؟
تكلمت الخالة بصوتها المهزوز من كبرر السن.. ورجفة العمر في شفاتها ويدها المجعدة ترتجف:. مافيني شي .. بس على طرف خشمي.. شميت هواها وريحتها
عايشة وموزة كثير يسمعون عن الجازي من الخالة رحيـمة: عمتي الجازي؟
ابتسمت رحيمة على سماع اسم الجازي: ايه... عمتكم الجازي... ريحة فوادي.. وروح هالوادي..
عبدالله اللي دخل البيت وهو حامل معاه سلة من الليمون الطري:.. وهاااااااااااااج ليمونج.. (يقعد يمها من بعد ما كسر حاجز الذكريات فيها) لا تقولين رحت المزرعة وما ياب لي عبدالله الليمون
ضحكت موزة ويا عايشة ورحيمة تعجبت من هالصبي: حسبي الله عليك من صبي.. متى قلت عنك جذي بس؟؟؟ هاي الا طوالة لسانك
عبدالله وهو يجفس ريله ويقعد على الكرسي: الحين تقولين جذي؟؟ جني ماسمعج تقولين لبو رياض ولا لام زيدان الخبازة..
ضربته رحيمة بخفة يدها الواهنة على جتفه: حسبي الله عليك.. الله يعينها بنت الاوادم اللي بتطيح فيك..
عبدالله اللي كان يضحك تكدر وموزة تكلمت عنه: شفيج يا خالتي ما دستي الا على عوقه..لأ ا تييبين له طاري البنات ووالزواج ما يفكر فيه..
عايشة: يكره صنفنا يا خالة ويقول البنات مافيهم خير
رحيمة: وشوووو؟؟ مافيهم خير؟؟ عيل من اللي حملت فيك وتحملت ويع الموت تسع شهور لك؟؟؟ ريال مثلك ولا ابوك؟؟؟ رسول الله يقول
البنات وعبدالله: صلى الله عليه وآله
كملت رحيمة: البنات زينة الدنيا ورحمة من رب العالمين..والا كفو ريال يحمل يوم واحد اللي هي تحمله شهور ومروور..
موزة: عيني عليييييييييييييج باردة يا خالتي والله انج صبتي وما خبتي
استلمتها رحيمة: عاد مو البنات اللي بهالزمن... (ابتسم عبدالله) بنات زمان اول.. وين ما تحملوا.. وعانوا.. وشالوا وقهروا اللي ما ينقهر.. هذووووول البنات.. والا انتو.. ما تعرفون لشي تحاتون جمالكم..
عبدالله وهو يبوس خد رحيمة الذابل بنعومة: والله هاي اللي بتسرق لي عقلي.. وين الي مثلج يا خالة ماكو منج ترى ثنتين..
عايشة وهي تتحرك بحماس: خالتي سولفي عن عمتي الجازي..
عبدالله وهو متعومس شوي:.. شيابها على بالج؟؟
رحيمة وهي تتنهد بحرارة: وشلون ما تيي الجازي.. وصوتها وروحها في هالمكان تصدح..
عبدالله وهو يتمصخر: هاي هوا الخريف يا خالوووو ماهي الجازي.. لا يكون بس روحها تطاردنا.. ترى انا اسمع اصوات في الليل
موزة وهي تعطيه نظرة حادة: عبدالله بلا غشمرة..
وقف مكانه: اذيتونا.. الجازي والجازي.. مادري شسوت لكم الجازي.. بس تعرفون.. تعجبني.. يوم انها ما تحقق لها اللي تبيه حقرت الكل وشردت من الديرة..
عايشة: عبدالله بلا هالكلام الكريه..
عبدالله: بلا هالكلام وبلا عبدالله مو هذا قصدج.. انا اروح عنكم احسن لي..

طلع عبدالله من الصالة لكن من طلع من الشرفة.. ظل ورى احد الابواب الخشبية المفتوحة وين ما يقدر يسمع صوت رحيمة وهي تتكلم عن الجازي.. يحب الماضي ويحب كلامها عن عمته الجازي. ولكن غروره يمنعه من البوح بهالشي لانه يبي يكون قوي. .يسلح نفسه عن ذكريات الماضي بغروره وهو معتقد انه قوة..

عايشة وهي تناظر شرود عيون رحيمة بطلعة عبدالله: خالوه ما عليج منه ترى اهو مو صاحي ساعات..
رحيمة وهي تتكلم بحزن: مثله مثل ابوه... حاجز الدنيا عن نفسه بصلابه.. ويباس.. ما يدري ان قلب الريال ارخى من العيين..
موزة وهي توسع صدر رحيمة: خالة قوليلي عن عمتي واللي يسلمج.. قوليلي عنها في صباها ويا ابوي..
رحيمة وهي تبتسم وكان الجازي في عيونها بجلابيتها الملونة.. وشعرها المهدول.. وركضها على طول المزرعة والدهاليز:.. سموها الجازي.. مع ان يدتكم الكبيرة تبيها مريم.. لكن يدكم ياسين سماها الجازي ليش ان المحبة تجووووز لها.. وابوكم حارب الي اليوم قد اليبل.. كان قبل كبـــــــر هالسدة (وهي تأشر على احد الصناديق الواقفة وهي تضحك) بس بعد كان في قلبه رجووولة ياسين وابوه سالم الله يرحمه ويفغر له ذنوبه..
عايشة: خالتي شلون كانت الجازي وياج؟؟؟

هبت نسمة هوا عابرة ودغدغت روح رحيمة.. ورجعت الحرمة اللي كانت بالاربعين من عمرها.. تربي الجازي وحارب وعيالها عبدالمجيد وصقر وانعام بنتها ..
-------------------------------------

واللي تكلمت فيه سرور كان بسيط.. يتكلم عن طفولة امهم.. وعن حارب.. وعن يدها ياسين الزراع..

سرور تتكلم بصوت اجش من حلاوة الكلام المكتوب: يدي ياسين كان الزراع الوحيد .. اللي شال الارض بيدينه وذوقها عرق جبينه.. لمسها وقلبها بيدينه.. واذا احتر عليه الليل يتبرد بترابها.. الكل كان يقول له.. يا ياسين.. وينك عن الغوص واللولو.. يقول لهم.. انا البحر يغدرني.. وملحه يضرني.. ولي حرمة تشهد عليه بالمحبة والخير.. وافيه وقلبها كبيـر.. وكان يعني بها مزارعه الصغيره اللي كانت توفي بالخيــــر للقريب والبعيد..
حور وهي مو مصدقة ان امها لها ماضي.. ولها اهل.. ولها ناس:.. سرور خلج من هالكتاب.. وروحي لواحد ثاني..
بدور: صببري.. الكتاب فيه ثلاث سنين.. مو معقولة ان هالسنين كلها ما تحمل شي مهم في حياة امي..
سرور وهي تلف على السنة الثانية: ..سمعوا الي مكتوب هني..

كملت سرور (( يرجع اليوم اخوي حارب من مصر .. دراسته ابعدته عنا سنين طويلة.. وبخل علينا بشوفته وبويه الحسن.. سمعت من يدي ياسين يوم راح له قلب ست شهور انه ما ينعرف.. ومثله مثل عبدالحليم وطق الربع.. ضحكت على يدي يوم قال جذي.. وظليت ارسم صورته في بالي واتفنن فيها.. ما كنت اعرف ارسم.. ولو كنت اعرف.. كنت بتصوره في بالي مثل ما انا متوقعة..

ظلينا ننتظره للعصر.. واذن العصر.. ويا المغرب والعشا كمل.. وانا بعدني انتظر اخوي من شرقت الشمس لمغيبها.. ياتني الخالة رحيمة وقالت لي ادخلي يالجازي باجر ايي اخوج..
ما رضيت..
ظاق صدري من قالت لي هالشي..
بعد يوم ثاني..!!!
انتظر فيه اخوي اييني من بعد غيابه الطويل..
لا ما يجوز لج النوم يالجازي الليلة قبل ما تكحلين عيونج بشوفته..
هذا الغالي اللي حملج وانتي صغيرة ولاعبج وسلاااج.. انتظريه.. ما بيضرج هالشي اكثر من ضر فراقه الطويل..

ولكني بعد.. انتظرت.. الى اليوم الثاني.. وباول الصبـح.. يانا حارب

حور وهي تصفح الدفتر: سرور لا تقعدين تقرين كل شي ترى ماكو شي مهم.. اقري اللي ورى
سرور وهي تعصب: حور علامج خلينا خطوة خطوة نمشي
حور وهي متنرفزة: مافيني صبــــــــــر..
بدور :حتى احنا مافينا صبر لكن متحملين.. اصبري ما بصيدج شي..
حور وهي تقعد مرة ثانية بملل وهي تزفر: اممممممممممممممف.. الللهم طولج يا روح..
سرور وهي ترد تقرى:... يوم شفت حارب ما صدقت.. صار طويل ووعريض.. وشعره اسود وقصـير وحتى ان له شنب.. بس ماقدرت المه مثل ما كنت ابي.. كان وياه واحد ثاني.. من ما سمعت من خالتي رحيمة ان ارفيجه اللي بالدراسة يا وياه يرتاح ويكمل دربه لهله.. الله يرده لهله سالم عشان اقدر اقعد ويا اخوي وارتاح معاه...
تكمل سرور مذكرات اليوم الثاني:.. يا صفحاتي.. مادري شنو اللي صار فيني اليوم.. نسيت خوفي من ربي.. وتميت اناظر اللي يا ويا اخوي حارب.. ما شفت له شبيه.. مليــح يا صفحاتي.. وله من البسمة اللي رسم النور في دربي.. شعره الطويل الفاتح وعيونه الحلـوة خبلوني.. حتى اني ظليت ابحلق قيه طول الوقت.. يا صفحاتي.. شسوي.. صليت لربي واستغرفت ولكن هالألم الغريب في قلبي يحوم مثل الطيـر الجريح.. شسوي يا صفحاتي..
ومذكرات اليوم الثالث:.. راح يالمذكرات... راح اللي خبل عقلي هالفتـرة.. راح وما راح الألم اللي خلفه في قلبي .. راح وعيني بجت على روحته.. راح وانا نايمة باقي الليل اللي سهرته البارحة.. وكأنه ينتظرني يالمذكرات.. يالله.. ياليت راح الألم اللي يابه وياه معاه.. معقولة كل هذا من نظرة حرام؟؟؟ الله يسامحني.. لمتى بس بظل بتأنيب الضميــر..

وانتهت السنة على هالمذكرة..

وحور مو مصدقة: من تقولون هالانسان؟؟؟
سرور وهي تصفح السنة الثالثة: خلينا نشوف... (وهي تتصفح الصفحات وتخطر بعضها.. لمن وصلت الى مذكرات معنونة بزواج حارب)... اسبوع واتيي حرمة اخوي يالمذكرات.. وماهي وحدة غريبة.. بنت الغواص الجبيـر في ديرتنا.. كايد بن محباس.. وصديقتي في المطوع.. سالـمة.. سالمة وتسلم من شر عيون الحاسدين.. ماجذب عليج لو اقول لج يالصفحات انها من اجمل ما رأت عيني.. جمالها ديني ورباني.. وبياضها من اللبن الصافي.. بس اللي اعرفه انها مريـضة.. وفيها شي من علل الرحمن اللي تثيب المؤمن وتيمع له الحسنات والأجر.. يقولون كانت في خاطر يدي ياسين وخطبها لاخوي حارب عشان اتييب له الاولاد اللي يتمناها.. طبعا ما بقدر اشوفها الا بليلة الحنا.. وماااااااقدر انتظر اكثر يا ليلة الحنة.. حلي علينا بســرعة.. قلب الجازي ما يتحمل الانتظار اكثر..

--------------------------------

رحيمة سكتت وهي توصف الجازي وحلاو ة روحها ووهدوئها وجمالها وكلامها الكبيـر ومخها الاكبر...

موزة المنغرمة بعمتها: والله حرام انها مب ويانا اليوم عشان انتمتع بها..
عايشة اللي تعرف اللي سمعته بس: حسبي الله على اللي كان السبب في انها تختفي عنا..
رحيمة وهي تحاول تخبي هالشي.. لان السبب في روحة الجازي كانت امهم محد غيرها.. : حسبي الله عليه.. وكل ظالم مرده ينرد عليه الظلم..

عبدالله اللي مل من القعدة عند الشرفة وتسمع في كلام الخالة رحيمة طلع ببرع وهو يتنسم رياح العصر الحلوة... ووسط هالانفاس التف راسه الى البيت الكبير.. ويا في خاطره انه يروح داخل مع ان روحاته قليلة وبسيطة مجرد التجول في الدهاليز وبس.. لكن هالمرة كان فيه شي يبيه يروح هناك.. شي يخبره ان هذي هي فرصتك انك تروح هالمكان للمرة الأولى ويمكن الأخيـرة..

دخل داخل البيت القديم وتلمس في جدرانه البنية الطينية.. كيف انها متحملة هالجو ومتحملة الصعاب وباقية مثل الصرح اللي يبين اهميـة الماضي .. تعمق دخول عبدالله الى داخل الغرف والمطبخ اللي يصير في الجهة الجنوبية من البيت.. اللي يتخلله في الوسط حوش كبيـر شوي والشير اثاره واضحة

وقف مكانه عبدالله بصلابة ونظرة من التيبس بانت على ويهه.. ونطق لسانه بالكلمات اللي كان يخاف انها تصير صج:... محد بياخذ هالمكان مني.. انا صاحبه واهو ملكي... ولا انتي بعد يالجازي..

عايشة داخل الاستراحة ويا رحيمة تصر انها تعرف اشياء اكثر عن عمتها: خالتي تكفين خبرينا اكثر عنها..
رحيمة تبتسم وموزة تعرف بتعب الخالة وكبر سنها: عويش بسج عاد.. ما تشوفين الخالة تعبانة شوي..
رحيمة: قولي عن روحج انا والله ماني تعبانة
عايشة: بس عيل خالتي قوليلي اكثـر..
رحيمة: شقول لج يام السوالف انتي
عايشة : امممممممم.. من فينا تشابهها اكثر..
رحيمة تناظر الثنتين.. مع ان موزة تحاول انها ما تبين شوقها للاجابة :.. كايد يشابهها اكثر منكم..
عايشة: لا تنادونه كايد ماحب هالاأسم.. اسمه ناصر..
موزة : بس كايد هم اسمه يا عويش..
عايشة: ما يخصني.. اسمه ناصر.. يعني من زود الاسماء له اسمين..
موزة: خالتي ليش اخوي ناصر عنده اسمين.. كايد وناصر..
رحيـمة وهي توضح للبنات هالسر اللي ما يعرفونه:.. سالمة امه الله يرحمها .. اسم ابوها كايد.. وكانت اهي عيون ابوها وهو ضناها اللي ما حملت به.. عاد ما توفى ابوها يالغلا الا قببل ولادتها بايام في الغوص.. كان يحاول يطلع زيد ولد النجار موسى.. ونجى زيد وتوفى ابوها الله يرحمه.. ومرضت سالمة على وفاة ابوها لمن ولدت الصبي.. عاد ابوكم كان في خاطره اسم ناصر.. وفي خاطر امه كان كايد.. سموه اسمه الاصلي ناصر لعيون ابوكم.. واللي ينشدونه به اهووو كايد.. لكن ابوكم من بعد وفاة حرمته تزوج امكم وتمت اهي تنشده بناصر.. وكبرر مع الاسم اللي يرافجه الحين.. (تنهدت رحيمة بحرارة) وهذا الثاني بعد ما يندرى متي تييبه ريح هالوادي لنا مرة ثانية..
عايشة تتكلم بصدق هالمرة: الله يجازي اللي كان السبــب
موزة وهي عارفة باللي تقصده اختها: عيب لا تقولين جذي.. المسامح كريم
عايشة ووهي تتغاضى عن هالكلام السليم: كله نسامح.. والناس ما تسامح.. متى بنصير احنا اللي نعاقب والاودام اللي تستسمح.. متى بينقلب الحاال
حطت رحيمة عباتها على راسها ووقفت: يا عويش... يقولون اهل اول.. من حبه ربه بلاااه.. واعظم البلية اهي دخلة الجنة يا بنتي.. دايما كوني المظلومة ويرتفع الحاجز عنج وعن ربج...
موزة وهي تسند رحيمة من يدها: خالتي عاد لا تقاطعينه..
رحيمة بويهها المستعيب: وا عجباه منكم.. الحين انا كل فترة وفترة ايي لاخوكم هني .. بقطعكم انتو الحين؟؟ انتو اللي لا تقطعون.. ممصخكم من بنات..
نزلت لعايشة وهي تعطيها حرز مسوينه بالقرآن: شوفي يا بنيتي.. حطي هالحرز تحت راسج اذا بتنامين
عايشة وهي مبتسمة: فديتج والله يا رحيــمة يا خالتي الطيبة

-------------------------------------------

في بيت علي كانت قراءة سرور للمذكرات بشكل متتابع من غير ما تتوقع والكل قاعد يسمعها.. وحور في حالة من الذهول وبدور في مغلف من الرومانسية واحساس غر يب تحس فيه لاول مرة.. وكانها تنتمي صج لعالم ثاني..

اما سرور فهي في منتهى السرور.. حزنها اللي كانت تحمله في قلبها لكونهم مقطوعين من شيرة العالم انتهى.. وكاهي تنتمي الى خال ويد واهل وعيال عم وكل شي.. واحلى من هالشي ماكو...

كانت الجازي تتكلم في الصفحات بصوت سرور:.. يات ليلة الزواج.. والكل محتفي يا مذكراتي بها..وسلوومة عمرها ما كانت احلى .. مع اني اعرفها من قبل بس حسيت عمري انها قطعة من القمر ونازلة علينا.. وحارب اخوي كان ينتظر الليلة تعدي على احر من اليمر.. ولكن شكله بينتظرها اكثر.. العرس توه بادي.. ويدي ياسين حالف انه يمر لسبع ليالي.. مادرري يا ذكرياتي.. اليوم سمعت الحريم كلها تمدحني وتمدح جمالي وكانهم يشوفون فيني شي انا ما شوفه.. وشفت ام سالمة تحنيها بنفسها بالعيين وتمنيت لو ان امي على هالدنيا عشان تحنيني حق ريلي بليلة حنتي..
الليلة الثانية..
زين اني سرقت الوقت يالمذكرات.. شكثر شغل انحط على راسي.. وما سلمت اليوم بعد من الاطراءات.. وخصوصا غنية مرت عمي فلاح.. تتمناني مثل ما خبرتني الخالة رحيمة لولدها غانم.. لكن انا ماقدر اشوف غانم زوج لي.. شي فيه يخليني احس بالاخوة له.. او يمكن ولا شي لان حارب مانع علي اني اتخالط ويا احد منهم حتى وان كانو عيال عمي..
اللي يايتج اليوم عشانه يا مذكراتي شي ثاني.. شي وحفوز في قلبي من قبل سنة يوم اخبرج.. وكاهو الشي ايي على بالي كهب نسيم البحر على بال البحارة .. يا مذكراتي قلبي ما هدى اليوم ولا لحظة... ياترى شلي ينتظرني من بعد هالزواج.. مع اني بلقى اخت وبلقى حبيبة وونيسة.. اتمنى يا ربي اني اكووون فرحانة ويا سالمة..
الليلة الثالثة..
عشى الرياييل كان مبتدى من فير يا صفحاتي.. واخوي حارب حمرى عيونه ويبي يرقد ومحد مخليه.. كل لحظة شي.. يا عرضة ولا شعر ولا فروس ولا شي من اللي في بالهم.. ولكن اخوي حارب يوم خذت له الدخون ما كان مرتاح شوي.. يوم سألته قال لي.. شنوا لفرح اللي مب مكتمل بالاحباب.. انا استغرببت.. وظنيت انه يعني امي ولا ابوي الله يرحم ارواحهم.. ويوم قلت ليدي ياسين قال لي ما عليج من اخوج.. حرمته واحشته.. وتم يقول لي قصته ويا يدتي ام سـالم..
بصراحة يا مذكراتي.. اتمنى من الله العزيز انه يكمل فرحة اخووي باحبابه اللي اهو يتمناهم..

الليلة الرابعة..
ما بتصدقين يا مذكراتي اللي صادني اليوم؟؟ معقولة.. شي طبيعي هذا؟؟ اني اشوفه من بعد هالمدة كلها.. كنا في بيت سلوووم عشان حناها.. وانا بعد تحنيت مع اني كنت مشغولة بس خالة رحيمة خلتني اتحنى.. ويوم رجعت شفته قاعد عند حوض الماي ويا حارب ويسولفون والترعة تخر ماي على رويلاتهم (ارجلهم) ما شافني.. لكني شفته.. شفته وفز قلبي يوم شفته.. وماصدقت عيوني.. ويوم رحت الغرفة حسيت روحي متنازعة في جسدي يا تظل وياي يا تروح لعنده وعند حبيب قلبي اخوي حارب.. امد ريلي في ماي الترعة.. وياني حارب الغرفة وهو فرحان.. يقول لي يا الجازي الحين الفرح اكتمل.. وحبيب قلبي علي معاي..
تغنت اذني يا صفحاتي باسمه.. علي.. يا محلاه من علي.. شي فيه يا صفحاتي يخلي النسيم والزرع والتراب يفوح منه الطيب.. شي منه ينتشر ويرسل مشاعر محبة وفرح.. شي منه يخليني اين واستخف وانا بقمة عقلي..
يا صفحاتي.. مادري شنو اللي يمكن يصيبني اكثر من اللي صايبني.. بس اللي اعرفه اني.. ما عدت الجازي الي كانت قبل..

اليوم الخامس..
كل اللي يمر بمشاعري في كوم.. واللي لقيته اليوم فكوم.. ما صدق.. ماصدق ان عيوني طاحت على علي اليوم.. وانا في اخس حالاتي.. كنت اعين ويا خالتي رحيمة وبنتها.. والا شوي وينشدني حارب وانا اعطل نداه والعيين شاغلني.. ويوم ييت بطلع له طلعت من غير اي غطا ولا حجاب.. وانصدمت يوم شفته جدامي.. كان واقف ويا حارب ومت من الحيا ووصرخ علي حارب لمن طفرني ودخلت المطبخ.. لكن الحمد لله ما صار شي.. لكن من بعد شنو.. ما حسيته يطالعني..ولا حسيت بعيونه اتيي صوبي.. لكن اللي حسيته اني قطعه منه واهو مني.. وهذا اللي خوفني.. عمري ما حسيت اني قريبة من احد كثر هالانسان.. شي فيه خلاني ارتبط .. بس ياقلبي مادري ان جان هالشي متبادل ولا لاء..

اخر ليلة في الاحتفال...

مر يومين ولا ادري شي عن علي ولا عن اخوي حارب لانهم راحو اللاستراحة ويا باجي الرياييل ..سبحو في الترع وجهزوا اخوي وبيتنا كان متروس حريم يجهزون المكان حق العروس.. وانا اللي في قلبي منعني اني اتحرك يا صفحاتي.. ما قدرت افرح ولا قدرت استانس لاخوي الوحيد.. لان قلبي كان مشغول وينطر فرح خاص فيه.. ويوم رجعنا من بيت سالمة وهي ويانا كان المكان كانه قطعة من الجمر من كثر الليتات والنار اللي انضرمت بكل مكان تسخن الطيران اللي دقت ووصل صوت ضربها لاخر الدنيا.. وانا من بعدها ما عادت لي دنيا.. علي اختفى وراح.. وسمعت من اخوي حارب يقول ليدي ياسين.. ان علي ما راح يرجع .. قدم تنازلات عشان ايي في اخر اللحظة من العرس ومشى قبلل ما يدخل حارب على حرمته بالكوشة..

يا صفحاتي.. انا انضرب قلبي بنظرة عيـن انسان.. خلتني احس ان كياني منقلبب .. واحس نفسي مريضة.. وبظل مريضة لمن تتشافى عيوني من ضنى شوفته الغالية..
مادري يا صفحاتي.. علي بلاقيه مرة ثانية؟؟؟ ولا راح يكون مجرد ذكرى مثلها مثل الذكريات الباجية..

وسكتت سرور عن الصفحات وفي قلبها شعور كبير من الفرحة والغمور العاطفي:.. امي حبت ابوي قبل لا تتزوجه..
حور وهي بعدها مستغربة من اللي قاعدة تمر فيه: كملي سرور.. خلينا نشوف شنو صار بالضبط.. ووين راحو اهل امي؟؟
بدور وهي في غاية التأثر: مادري ليش احس ان هالحارب وققف في ويه امي ووابوي..

سرور وهي تسحب احد الدفاتر الموجودة..و كملت بصوتها في سرد احداث احد السنين اللي مرت فيها امهم من غير ابوهم.. وشلون انها في طول ذيج السنة ذكرته في قلبها لكن .. ما قدرت تشوفه بعينها طول هالسنين..

-----------------------